कोल्हापूर : कोल्हापुरात बिनधास्त या, कोण विचारतोय? अशीच स्थिती सध्या आहे. जिल्ह्याच्या सीमानाक्‍यांवर कोरोना संसर्गाची नोंदी-तपासणी होत नाही. इतर राज्यात, जिल्ह्यात लॉकडाउन होत असल्यामुळे अनेक जण कोल्हापुरात येत आहेत. यातून जिल्ह्यात संसर्ग वाढण्याची शक्‍यता आहे. 

औरंगाबाद, नागपूर, सोलापूर येथे शंभर टक्के लॉकडाउन आहे. मुबंई-पुण्याची परिस्थिती यापेक्षा भयंकर होत आहे. तेथील लोक कोल्हापुरात येण्यापूर्वी त्यांच्या नोंदी घेतल्या, तपासणी झाली तरच पुन्हा गावोगावी, शहरात वाढणारा संसर्ग रोखता येईल, अन्यथा पुन्हा एकदा गतवर्षी प्रमाणे गावागावांतून कोरोना पॉझिटिव्ह रुग्णांचे आकडे वाढण्याची शक्‍यता नाकारता येत नाही.

नाक्‍यांवर येणाऱ्यांच्या काेरोनाबाबत नोंदीच नाहीत

कोगनोळी टोल-सीमा नाक्‍यावर ही ये-जा करणाऱ्या वाहनांची माहिती नोंद करून घेतली जाते. त्यांना कोणती लक्षणे आहेत की नाही, कोविड चाचणी केली आहे की नाही याची विचारणा केली जाते. यासाठी तेथे आशा वर्कर्स आहेत. दिल्ली, गुजरात, आंध्र प्रदेशात ही जाण्यापूर्वी किमान ७२ तासापूर्वीच कोरोना चाचणी झाली आहे काय याची विचारणा केली जाते. किंबहुना विमानासह अन्य प्रवासात अशा  चाचणीच्या अहवालाची मागणी केली जाते. यातून कोल्हापुरातील लोक ज्या ठिकाणी जाणार आहेत ते त्यांच्या  जिल्ह्याची,राज्याची काळजी घेत आहेत. तर पुणे, मुंबई, बेळगाव, सोलापूर अशा ठिकाणाहून कोल्हापुरात येणाऱ्यांच्या चाचणी किंवा नोंदी आपण काहीच घेत नाही. 

हेही वाचा- गोकुळ’मध्ये आबिटकरांचे ठरेना ;  सत्तारूढ गटाला मोठे खिंडार

सद्य स्थितीला कोल्हापूर जिल्ह्याच्या कोणत्याही सीमा नाक्‍यांवर तपासणी करण्याचा विचार नाही. नोंदी ही घेण्याचे नियोजन नाही. तूर्तास सध्या सर्वांना ये-जा करण्यास मुभा राहणार आहे. आजच्या घडीला यावर कोणतेही निर्बंध नाहीत.
-दौलत देसाई, जिल्हाधिकारी, कोल्हापूर