कोनवडे, कोल्हापूर : भुदरगड तालुक्‍यातील निसर्गसंपन्न व शासनाने इको सेन्सिटिव्ह झोन म्हणून आरक्षित केलेल्या फये परिसरातील वनक्षेत्रात अधिकाऱ्यांच्या दुर्लक्षामुळे वृक्षांची मोठ्या प्रमाणात तोड होत आहे. वृक्षतोडीमुळे निसर्गाने नटलेला परिसर बोडका होण्याच्या मार्गावर आहे. वृक्षतोड करणाऱ्यांवर कारवाई करण्याची मागणी परिसरातून होत आहे. 
फये-हेदवडे परिसरात फये लघुपाटबंधारे प्रकल्प असल्याने पर्यटक येथे भेट देतात. पण वन विभागाच्या अधिकाऱ्यांच्या दुर्लक्षामुळे राजरोस वृक्षतोड सुरू आहे. एकीकडे शासन वृक्ष लागवडीसाठी कोट्यवधी रुपये खर्च करते. पण दुसरीकडे निसर्गसंपन्न फये परिसरात वृक्षतोड करून बोडका होत आहे. फये-हेदवडे हा परिसर शासनाने इको सेन्सिटिव्ह झोन म्हणून आरक्षित केला असताना देखील वृक्षतोड सुरू असल्याने आश्‍चर्य व्यक्त होत आहे. जंगल भागातील अष्टम, बाभूळ, निलगिरी, सिसम, उंबर, कडुनिंब, जांभूळ, धावडा, करंज आदींसह जंगली वृक्षांची राजरोस तोड होत असल्यामुळे निसर्गप्रेमी नागरिकांतून तीव्र संताप व्यक्त होत आहे. फये येथे तोडलेल्या लाकडाचे ढीग गावाच्या मध्यवस्तीत टाकले आहेत. परिसर उजाड बनविणाऱ्या लोकांवर कारवाई व्हावी, अशी मागणी निसर्गप्रेमींतून होत आहे. 

फये-हेदवडे हा इको सेन्सिटिव्ह झोन म्हणून आरक्षित असल्याने सदर घटनेची माहिती घेऊन लाकूड तोडणाऱ्यांवर कारवाई केली जाईल. 
- के. एस. आहेर, वनक्षेत्रपाल.