शिरोली पुलाची : प्राथमिक आरोग्य केंद्रातील (Primary Health Center) वैद्यकीय अधिकारी व कर्मचाऱ्यांच्या हलगर्जीमुळे महिलेची आरोग्य केंद्राच्या दारात वाहनातच प्रसूती झाली. दरम्यान अर्भकाची वाहनातच नाळ कापल्याने मृत्यू झाला. (Kolhapur) यामुळे दोषींवर कारवाई झाल्याशिवाय मृतदेह ताब्यात घेण्यास नकार देत नातेवाईक, ग्रामस्थांनी आरोग्य केंद्राच्या दारात ठिय्या मारला.

येथील माळवाडी भागातील एका गर्भवती पोटात दुखायला लागल्यामुळे प्रसूतीसाठी सकाळी ७ वाजता प्राथमिक आरोग्य केंद्रात खाजगी वाहनातून आणले. यावेळी कर्मचाऱ्यांनी कळा सुटल्यावर या असे सांगून त्यांना परत पाठवले. (Kolhapur News) पुन्हा नऊ वाजता त्या आरोग्य केंद्रात आल्या; पण त्यांच्यावर उपचारास टाळाटाळ करत कर्मचाऱ्यांनी केंद्रात घेतले नाही. परिणामी खासगी वाहनातच प्रसूती झाली. त्यानंतर सकाळी साडेनउच्या सुमारास १०८ रुग्णवाहिकेचे डॉक्टर आल्यावर अर्भकाची नाळ कापली. त्या वेळी अर्भक दगावले होते. त्यामुळे बेडेकर यांच्या नातेवाईकांनी आक्रोश करत प्राथमिक आरोग्य केंद्राच्या कर्मचाऱ्यांनी वेळेत उपचार केले नसल्याने अर्भक दगावल्याचा आरोप करीत कारवाईची मागणी केली.

सरपंच एस. बी. खवरे, उपसरपंच एस. बी. यादव, माजी जिल्हा परिषद सदस्य महेश चव्हाण, सरदार मुल्ला, जोतिराम पोर्लेकर, अर्जुन चौगुले, योगेश चव्हाण, राहुल बेडेकर, संजय बेडेकर यांनी वैद्यकीय अधिकारी डॉ. जेसिका अँड्र्युज यांना धारेवर धरले. दोषी कर्मचाऱ्यांवर कारवाई करा अशी मागणी करत दारात ठिय्या मांडला. यानंतर जिल्हा परिषदेचे माता बाल संगोपन अधिकारी डॉ. फारुक देसाई यांनी संबंधित कर्मचाऱ्यांवर कारवाई करण्याचे आश्वासन दिल्यानंतर नातेवाईकांनी मृतदेह ताब्यात घेतला.

हातकणंगलेच्या सभापती डॉ. सोनाली पाटील यांनी वैद्यकीय अधिकारी डॉ. अँड्र्युज यांची भेट घेऊन माहिती घेतली व सकाळच्या पाळीतील कर्मचारी येण्यापूर्वी रात्र पाळीतील कर्मचाऱ्यांनी आरोग्य केंद्र का सोडले, असा प्रश्न उपस्थित केला. कामात हलगर्जीपणा करणाऱ्या कर्मचाऱ्यांना तात्काळ निलंबीत करा, अशी मागणी सभापती डॉ. पाटील यांनी केली.

"पुलाची शिरोली प्राथमिक आरोग्य केंद्रात आज झालेली घटना दुर्दैवी आहे. घटनेची चौकशी करून यात दोषी असणाऱ्यांवर कारवाई करण्यात येणार आहे."

- डॉ. फारुक देसाई, माताबाल संगोपन अधिकारी, जिल्हा परिषद