कबनूर - कबनूर नगरपरिषद व्हावी, या मागणीसाठी गावातील सामाजिक कार्यकर्त्यांनी, विविध पक्षातील कार्यकर्त्यांनी बेमुदत साखळी उपोषण करुन हा प्रश्‍न आता पुन्हा ऐरणीवर आणला आहे. यासाठी राजकीय ताकद किती लागते यावरच कबनूरचा हा प्रश्‍न मार्गी लागणार आहे. 

हे पण वाचा - आघाडी सरकारचा मोठा निर्णय; आता वाढणार शेतकऱ्यांचे उत्पादन 

कबनूर नगर परिषद व्हावी, यासाठी फक्त ठरावच झाले होते. आता मात्र त्याला आंदोलनाचे स्वरुप आले आहे. याप्रश्‍नी झालेल्या आंदोलनाला सर्वपक्षीय व्यक्ती, लोकप्रतिनिधी, सामाजिक कार्यकर्त्यांनी भेट देऊन पाठिंबा दिला. या बेमुदत साखळी उपोषणावेळी उपोषणकर्त्यांना पाठिंबा देताना कबनूर नगर परिषद झालीच पाहिजे, असा सूर सर्व नेत्यांचा होता. नगर परिषद झाल्याशिवाय कबनूर गावचा सर्वांगिण विकास अशक्‍य असल्याचे सांगत सद्यस्थितीतील गावातील विविध समस्या समस्यांचा पाढा वाचण्यात आला. नगरपरिषदेबाबत गैरसमज पसरवणाऱ्यांचाही यानिमित्ताने समाचार घेण्यात आला. ज्या गावात नगरपरिषद किंवा नगरपंचायत झालेल्या आहेत, अशा गावातील वस्तुस्थिती मांडली. नगर परिषदेबाबत कारण नसताना गैरसमज पसरवू नये, असे आवाहन केले. 

हे पण वाचा - महाराष्ट्रातून कर्नाटक बसला का वाढलीय मागणी...? 

कबनूर नगरपरिषद व्हावी या मागणीसाठी बेमुदत साखळी उपोषण करणाऱ्या युवकांनी खासदार धैर्यशील माने यांच्या आश्वासनानंतर बेमुदत साखळी उपोषण तात्पुरते स्थगित केले. तथापि बेमुदत साखळी उपोषण करणाऱ्या युवकांनी नगरपरिषदेचा प्रश्न प्रलंबित राहिला तर पुन्हा तीव्र आंदोलन करणार असल्याचा इशाराही यावेळी दिला. गावचा हा प्रश्‍न आता पून्हा ऐरणीवर आला आहे. गावात एकमताने याबाबत आंदोलन झाले. आणि राजकीय लोकांनीही हा प्रश्‍न उचलून धरला आहे. त्यामुळे हा प्रश्‍न तडीस जाणार काय, याची उत्सुकता पुढील काळात असणार आहे. (क्रमशः)