कुरुंदवाड(कोल्हापूर) :  गेल्या महिन्यापासून कोल्हापुरात कुत्र्यांनी चांगलीच दहशत माजवली आहे. गेल्या महिन्यात कुत्र्यांच्या हल्ल्यात एका महिलेचा नाहक बळी गेला होता. त्यानंतर आज एका आणखी शेतकऱ्याचा हकनाक बळी गेला आहे. नवे दानवाड ता. शिरोळ येथील शेतकरी आप्पासो बाबु अंबूपे (वय ५९) याचा कुत्र्याच्या टोळीने हल्ला करुन बळी घेतला.आज दुपारी दत्तवाड दानवाडनजीक दावलमलिक पट्टीत ही घटना घडली.

गेल्याच महिन्यात याच परीसरात एका शेतमजूर महिलेवर कुत्र्यांनी हल्ला करुन बळी घेतला होता. त्यामुळे कुत्र्याची चांगलीच दहशत पसरली असून या परिसरात भीतीचे वातावरण निर्माण झाले आहे. दरम्यान गेल्या महिन्यात महिलेच्या मृत्तुनंतरही या कुत्र्यांचा बंदोबस्त करण्यात न आल्याने या शेतकर्‍यांचा हकनाक बळी गेला आहे.

हेही वाचा- भाजपचे तीन आमदार, उपाध्यक्ष, सभापती फिरकलेच नाही: मात्र खासदाराच्या उपस्थितीमुळे चर्चेला उधाण

याबाबत घटनास्थळावरुन मिळालेली माहिती अशी, 
आज बार‍ा वाजण्याच्या सुमारास आप्पासो अंबुपे दानवाड दत्तवाड मार्गावरील दावलमलिक पट्टी येथे जनावरांसाठी चारा आणण्यासाठी गेले होते.  साधारणतः दोनच्या सुमारास शेतातून किंचाळण्याचा व आरडाओरडा करण्याचा आवाज ऐकू आला त्यानंतर कुत्र्यांच्याही भुंकण्याचा आवाज ऐकू आला. त्याभागात शेतात आलेल्या शेतकर्‍यांना चार ते पाच मोठमोठया कुत्र्यांचे तोंड रक्ताने माखलेले दिसले व एका व्यक्तीचा कन्हण्याचा आवाजही आला. त्या शेतकर्‍यांनी कुत्र्यांना हुसकावण्याचा प्रयत्न केला मात्र उलट ही कुत्रीच अंगावर येवू लागली त्यामुळे शेतकरी घाबरेघुबरे झाले. 

थोड्या वेळाने आप्पासो अंबुपे यांच्यावर कुत्र्यानी हल्ला केल्याचे स्पष्ट झाले. एखाद्या हिंस्र प्राण्याप्रमाणे या कुत्र्यांनी अंबुपे यांना ओरबडून काढले होते. रक्ताच्या थारोळ्यात त्यांचा जागीच मृत्यु झाला. घटनेची माहिती त्यांच्या नातेवाइकांना व पोलिसांना कळविण्यात आली. पंचनामा करुन शवविच्छेदन करण्यात आले. मयत अंबुपे यांची दोन एकर शेती असून त्यांच्या मागे पत्नी एक मुलगा व दोन मुली असा परीवार आहे.

संपादन- अर्चना बनगे