जयसिंगपूर - उदगाव (ता. शिरोळ) येथील साखळे माळ्यातील दुसरीत शिकणारा संकेत राजेश बामणे (वय 8) हा गुरुवारी रात्री सातच्या सुमारास विहिरीत पडल्याचा संशय व्यक्त करण्यात आला होता. दरम्यान, संकेतचा मृतदेह सापडला असून एनडीआरएफ टीम आणि आपत्ती व्यवस्थापनाने हा मृतदेह शोधला आहे.

मिळालेली माहिती अशी की, संकेत हा गुरुवारी सायंकाळी सव्वा पाचच्या सुमारास शाळेतून घरी आला होता. शाळेतून आल्यावर अभ्यास करत बसला होता. दरम्यान, सातच्या सुमारास खेळून येतो असे सांगून घरातून बाहेर पडला, रात्री दहापर्यंत तो घरी आला नाही. यानंतर संकेतच्या कुटुंबियांनी त्याचा शोध सुरु केला असता तो सापडला नाही. गुरुवारी रात्रीपासून संकेतचे शोधकार्य सुरू होते. आज सकाळपासून पुन्हा एनडीआरएफसह, जिल्हा आपत्ती व्यवस्थापन यांच्यासह ७ पथकेांनी शोधकार्य सुरु केले होते. दरम्यान, या दोन्ही पथकांना आता त्याचा मृतदेह मिळाला आहे.

दरम्यान, कुटुंबियांनी शोधाशोध करुनही संकेत न सापडल्याने घराच्यांनी जयसिंगपूर पोलिसांना पाचारण केले. त्यानंतर पोलिस निरीक्षक राजेंद्र मस्के यांच्यासह २० कर्मचारी दाखल होऊन शोधाशोध सुरु केली. यावेळी घराजवळ असलेल्या विहिरीच्या काठावर संकेत याचा शर्ट व हाफ पॅंट आढळून आली. जयसिंगपूर पोलिस ठाण्याचे पोलिस निरीक्षक राजेंद्र मस्के यांच्यासह २० हुन अधिक पोलिस कर्मचारी संकेतचा शोध घेत होते. यावेळी मृतदेह सापडताच त्याच्या नातेवाईकांनी केलेला आक्रोश हृदय पिळवटून टाकणार होता.