रायबाग : डोक्यात दगड आणि कुराडीने घाव घालून वडिलाने मुलाचा निर्दयीपणे खून केला. पैसे आणि सोन्याच्या वादातून रायबाग तालुक्यातील खणदाळ येथे बुधवारी (ता. ७) पहाटे ४ वाजता ही घटना घडली. आलगोंडा चन्नाप्पा अजुरे (वय ४०) असे मयताचे नाव आहे. पोलिसांनी आरोपी चन्नाप्पा अजुरे (वय ८०) यास अटक केली आहे. 

हारूगेरी पोलिस ठाण्यात या घटनेची नोंद झाली आहे.
 याबाबत अधिक माहिती अशी, खणदाळ येथील चन्नाप्पा अजुरे यांना आलगोंडा व सदाशिव असे दोन मुले होती. त्यांची घरची सहा एकर जमीन आहे. चन्नाप्पाने दोघा मुलांना प्रत्येकी तीन एकराप्रमाणे जमीन वाटणी करून दिली होती. चन्नाप्पा हा दुसरा मुलगा सदाशिव याच्याकडे वास्तव्यास होता. चन्नाप्पाकडे रक्कम व दागिने होते. त्याचीही वाटणी करण्याची मागणी आलगोंडा याने केली होती. त्यावरून बऱ्याच दिवसांपासून वाद सुरू होता. पाच दिवसांपूर्वी त्यावरून भांडणही झाले होते. तेंव्हापासून चन्नाप्पा हा आलगोंडाच्या मागावर होता. मंगळवारी रात्री तो घरी झोपला असता पहाटे ४ वाजण्याच्या सुमारास डोक्यात दगड घातला. तसेच आरडाआेरडा करताच कुराडीने घाव घातले. त्यातच आलगोडा हा ठार झाला. सकाळी खूनाची घटना घडल्याचे उघडकीस आले.

हे पण वाचा - कोल्हापूर ; लघुशंकेसाठी थांबलेल्या तरूणाला लुटले

 याबाबतची माहिती मिळताच हारूगेरी पोलिस ठाण्याचे उपनिरीक्षक यमनाप्पा मांग, हनमंत अंबी, परमेश्वर गु़डरगी, पी. के. डोणी, आर. पी. कटेकर व सहकाऱ्यांनी भेट देऊन पंचनामा केला. उत्तरीय तपासणीनंतर मृतदेह नातेवाईकांच्या ताब्यात देण्यात आला. आरोपी चन्नाप्पाला पोलिसांनी अटक केली असून अधिक तपास सुरू आहे. मयत आलगोंडा याच्या मागे दोन पत्नी, चार मुलगे असा परिवार आहे.

संपादन - धनाजी सुर्वे