जयसिंगपूर - राज्यावरील कोरोनाचे संकट दूर करण्यासाठी सर्वच पातळ्यांवर प्रयत्नांची पराकाष्टा केली जात आहे. समाजातील सर्वच घटकांकडून कोरोनाला हरविण्यासाठी आपल्या परीने योगदान दिले जात आहे. शासनाला पाठबळ देण्यासाठी राज्यातील पंधराशे माजी आमदारांची एक महिन्याची पेन्शन कोरोनाच्या उपाययोजनांसाठी देण्याबाबतचे पत्र मुख्यमंत्री उद्धव ठाकरे यांना देण्यात आले आहे. यातून साडेसात कोटींचा निधी उपाययोजनांसाठी मिळून माजी आमदारांचेही यासाठी योगदान लाभणार असल्याची माहिती, शिरोळचे माजी आमदार उल्हास पाटील यांनी दिली. 

कोरोनाचे राज्यावरील संकट गडद होत आहे. देशातील अन्य राज्यांच्या तुलनेत महाराष्ट्रात कोरोना रुग्णांचे प्रमाण अधिक आहे. दिवसेंदिवस हे प्रमाण वाढत चालल्याने चिंता व्यक्त केली जात आहे. तीन आठवड्यांचा लॉकडाऊन करण्यात आला आहे. यामुळे भविष्यात मोठ्या आर्थिक संकटांचा सामना करावा लागणार असला तरी आजमितीस कोरोनाला हद्दपार करण्यासाठी सामुहिक प्रयत्नांची गरज आहे. लॉकडाऊनच्या काळात घरी बसून कोरोनाला हरविण्याची जिद्द शिरोळ तालुक्यातील जनतेने बाळगली आहे. यामुळेच अद्याप शिरोळ तालुक्यात एकही कोरोनाचा रुग्ण आढळून आला नाही. 

आता विद्यापीठांमध्ये सुरू होणार कोरोना टेस्टिंग लॅब...

तालुक्यातील आरोग्य यंत्रणेची माहिती घेत आहे. अनेक आरोग्य केंद्रांना भेटी देऊन अधिकाऱ्यांशी चर्चा केली आहे. शासन पातळीवर सर्व उपाययोजना सुरु असल्या तरी कोरोनाविरुध्दच्या लढाईत प्रत्येकाचेच योगदान लाभत आहे. सोशल डिस्टन्सींगसह विविध प्रकारच्या उपाययोजना राबविल्या जात आहेत. लॉकडाऊनच्या काळात गोरगरीबांना जीवनावश्यक वस्तूंची झळ बसू नये यासाठी शेतकऱ्यांसह सेवाभावी संस्थाही पुढे आल्या आहेत. वैद्यकीय अधिकारी, कर्मचारी, पोलिस आणि महसूल प्रशासनाने जीवाचे रान करुन विविध उपाययोजना प्रभावीपणे राबविल्या आहेत. 

शासकीय अधिकारी, कर्मचाऱ्यांच्या वेतनातील काही भाग कोरोनाविरुध्द लढ्यासाठी घेण्यात आला असून यामध्ये आता माजी आमदारांनीही योगदान देण्याचा संकल्प केला आहे. माजी आमदार समन्वय समितीने मुख्यमंत्र्यांना पत्र देऊन एक महिन्याची पेन्शन यासाठी देण्याचा निर्धार केला असल्याचे श्री पाटील यांनी सांगितले.