कोल्हापूर : शहरातील वाहतुकीच्या कोंडीचा प्रश्‍न सोडविण्यासाठी रस्त्यावरील बेवारस वाहने जप्त करण्याची कारवाई लवकरच हाती घेतली जाईल असे पोलिस अधीक्षक शैलेश बलकवडे यांनी स्पष्ट केले. वाहतुकीच्या नियोजनासाठी अतिक्रमण हटावाबरोबर कराव्या लागणाऱ्या सर्व उपाययोजनेसाठी महापालिका आयुक्तांसह प्रादेशिक परिवहन अधिकाऱ्यांबरोबर बैठक घेण्यात येणार असल्याचेही त्यांनी सांगितले. 

लॉकडाऊन उठल्यानंतर शहरातील वाहतुकीचा प्रश्‍न अधिक गंभीर बनला आहे. वाहतुकीला शिस्त लावण्याचे आव्हान पोलिसांसमोर उभे आहे. शहर परिसरातील वाहतुकीचे नियोजन करण्यासाठी उपाययोजनेबाबत अधीक्षक बलकवडे यांनी पत्रकारांना माहिती दिली. शहरातील मध्यवर्ती भागात पार्किंगची व्यवस्था नसल्याने मोठ्या प्रमाणावर वाहने रस्त्यावरच पार्किंग केली जातात. अनेक वर्षापासून शहरातील अनेक रस्त्यांवर बेवारस वाहने पडून आहेत. त्याचबरोबर काही व्यवसायिकांनी अतिक्रमण केल्याने वाहतुक कोंडीचा प्रश्‍न दिवसेंदिवस गंभीर बनू लागला आहे. त्यादृष्टीने उपाययोजनेचा एक महत्वाचा भाग म्हणून रस्त्यावरील बेवारस वाहने जप्त करण्याची मोहीम लवकरच हाती घेतली जाणार आहे. सुरवातीला शहरातील मध्यवर्ती भागात व टप्प्यापट्याने उपनगरापर्यंत ही कारवाई केली जाणार आहे. याकामात महापालिका व आरटीओ विभागाची मदत घेतली जाणार आहे. कारवाईत कोणाचीही गय केली जाणार नाही असे बलकवडे यांनी सांगितले. 

हेही वाचा - एसटी कर्मचाऱ्यांसाठी स्वेच्छा निवृत्ती ; 50 वर्षावरील कर्मचाऱ्यांसाठी योजना

11 नवे सिग्नल कार्यान्वित करणार 

शहरात सध्या 34 सिग्नल कार्यान्वित असून 29 एकेरी मार्ग आहेत. वाहतुकीची कोंडी दूर करण्यासाठी नव्याने 11 सिग्नल तयार आहेत. संबधित रस्त्यावरील रहदारीच्या वेळेचा अभ्यास करून महापालिकेकडून आवश्‍यक त्या उपाययोजना करून हे सिग्नल लवकरच कार्यान्वित करण्यात येतील, असे अधीक्षक बलकवडे यांनी सांगितले. 

अतिक्रमणावर हातोडा 

शहरातील अतिक्रमणामुळे रस्त्यावर वाहतुकीच्या कोंडीचा प्रश्‍न निर्माण होऊ लागला आहे. अशा अतिक्रमणावर महानगरपालिकेच्या मदतीने कारवाईची मोहीम सातत्याने राबविण्यात येईल. हटविण्यात येणारी अतिक्रमणाच्या ठिकाणी तातडीने डांबरीकरण करण्यात येऊन हा रस्ता वापरासाठी खुला करण्याचा प्रयत्न केला जाईल असे बलवकडे यांनी सांगितले. 

सम विषम पार्किंग 

शहरात पार्किंगची समस्या गंभीर आहे. गर्दीच्या ठिकाणी रस्त्याच्या दुतर्फा होणाऱ्या पार्किंगमुळे वाहतूक कोंडीत मोठी भर पडते. ती टाळण्यासाठी काही मार्गावर सध्या सम विषम पार्किंग सुरू आहे. हाच फॉर्म्युला इतर रहदारीच्या रस्त्यावर वापरला जाणार आहे. वाहतुकीच्या कोंडीसाठी आणखी काही भाग एकेरी करण्याचा विचार सुरू असल्याचे बलकवडे यांनी सांगितले. 

हेही वाचा - आणि हसन मुश्रीफ झाले भाऊक -

महापालिकेकडे पाठपुरावा 

शहरातील सिग्नलसह मुख्य चौकातील रस्त्यावर पट्टे मारणे, फलक लावणे, सिंग्नलची देखभाल दुरूस्तीसह आवश्‍यक त्या उपाययोजनेबाबात महानगरपालिका प्रशासनाकडे पाठपुरावा केला जाणार आहे. 

संपादन - स्नेहल कदम