कोल्हापूर : कोल्‍हापूर जिल्‍हा सहकारी दूध उत्‍पादक संघाने (Gokul Dudh Sangh) म्हैस दूध (Buffalo Milk) खरेदी दरात प्रतिलिटर दीड रुपया वाढ, तर गाय दूध खरेदी दरात प्रतिलिटर दोन रुपयांची कपात केली आहे. संचालक मंडळाच्या झालेल्या बैठकीत हा निर्णय झाल्याची माहिती संघाचे अध्यक्ष अरुण डोंगळे यांनी दिली.

आजपासून (ता. १) या निर्णयाची अंमलबजावणी होणार आहे. ‘गोकुळ’शी संलग्न म्हैस दूध उत्पादकांना दूध वाढविण्यास प्रोत्साहन मिळावे, या उद्देशाने दरवाढ केली असून, यामुळे म्हैस दूध उत्पादकांना दिलासा मिळणार आहे.

अलीकडे गाय दूध संकलनाचे प्रमाण वाढले असतानाच त्या दूध खरेदी दरात मात्र प्रती लिटर दोन रुपये केल्याने उत्पादकांना मोठा फटका बसण्याची शक्यता आहे. नव्या निर्णयानुसार, म्हशीच्या ५.५ फॅट ते ६.४ फॅट व ९.० एस.एन.एफ प्रतिच्या दुधास प्रतिलिटर एक रुपयाने वाढ केली आहे. तसेच ६.५ फॅट व ९.० एस.एन.एफ प्रतिच्या पुढील दुधास प्रतिलिटर दीड रुपये वाढ केली आहे.

आजपासून (ता.१) दूधपुरवठा करणाऱ्या जिल्हा व जिल्ह्याबाहेरील दूध उत्पादकांच्या गाय दूध खरेदी दरामध्ये २ रुपये कपात केलेले आहे. महाराष्ट्रमध्ये खासगी व इतर दूध संघांचे गाय दुधाचे खरेदी दर कमी झाले आहेत. बाजारपेठेतील दूध पूड, लोणी यांचे दर कमी झाले आहेत. या सर्व बाबींचा विचार करून गाय दूध खरेदी दर कमी करण्यात येत असल्याची माहिती डोंगळे यांनी दिली.

नवे दर असे (कंसात जुने दर रुपयात)

• म्हैस दूध - ६.० फॅट व ९.० एस.एन.एफ प्रतिलिटर ५०. ५० रुपये (४९.५०)

• ६.५ फॅट व ९.० एस.एन.एफ करिता प्रतिलिटर ५२.८० (५१.३०)

• गाय दुधामध्‍ये ३.५ फॅट व ८.५ एस.एन.एफ करिता प्रतिलिटर- ३३ (३५)