इचलकरंजी : पूर्ववैमनस्यातून एका कामगाराच्या मुलाचा धारधार शस्त्राने सपासप वार करून निर्घृण खून करण्यात आला. राहुल दयाळ (वय 22 ) असे खून झालेल्या तरुणाचे नाव असल्याचे समजते आहे. ही घटना आज पहाटे तीन वाजण्याच्या सुमारास येथील तीन बत्ती चौकानजीक घडली. याप्रकरणी एका सराईत गुन्हेगारासह दोघांना शिवाजीनगर पोलिसांनी ताब्यात घेतले आहे. खुनाचे नेमके कारण समजू शकले नाही. गणेशोत्सवाच्या धामधूमीत झालेल्या या खुनाने पोलिस सजग झाले आहेत. (murder news in ichalkaranji)

मिळालेली माहिती अशी, राहुल दयाळ हा आपल्या कुटुंबियांसमवेत तीन बत्ती चौका नजीक राहत होता. त्याचा काही दिवसांपूर्वी मित्रांबरोबर वाद झाला होता. या वादातूनच आज पहाटे तीन वाजण्याच्या सुमारास काही मित्रांनी त्याच्यावर हल्ला चढवला. या वादात दोघांनी धारदार चाकू सारख्या शस्त्राने त्याच्यावर सपासप वार केले. या हल्ल्यात तो रक्तबंबाळ झाला. त्याला त्वरित रुग्णालयात दाखल केले. मात्र उपचारापूर्वीचा त्याचा मृत्यू झाला.

या घटनेची माहिती समजतात परिसरातील नातेवाईक मित्रमंडळानी रुग्णालयासमोर मोठी गर्दी केली. घटनास्थळी पोलिसही दाखल झाले. एका सराईत गुन्हेगारास संशयीतास पोलिसांनी ताब्यात घेतले आहे. घटनास्थळी श्वानपथकाला पाचारण करण्यात आले आहे. गणेशोत्सवाच्या धामधुमीत खून झाल्याने पोलिस दलात मात्र खळबळ उडाली आहे.