इचलकरंजी : माजी खासदार राजू शेट्टी (Raju Shetti) यांनी येथील कार्यक्रमात स्वतंत्र लढणार असल्याचे जाहीर केले आहे. त्यामुळे आम्ही राजू शेट्टी यांच्या मागे पळणार नाही. त्यांना गरज वाटली तर ते आमच्याकडे येतील. त्यांच्या मागे नाईलाज म्हणून आम्ही जाणार नाही. त्यामुळे हातकणंगले (Hatkanangle Constituency) लोकसभा मतदार संघात इंडिया आघाडीतील घटक पक्षाचा हक्काचा उमदेवार द्यावा, अशी मागणी मेळाव्यात केली.

इचलकरंजी विधानसभा क्षेत्रासाठी इंडिया आघाडीचा (INDIA Aghadi) पहिला मेळावा येथे काँग्रेस भवनमध्ये घेतला. यावेळी आघाडीतील प्रमुख पक्षांचे पदाधिकारी उपस्‍थित होते. यावेळी काँग्रेसचे प्रदेश सचिव शशांक बावचकर, राष्ट्रवादी काँग्रेसचे मदन कारंडे, माजी आमदार राजीव आवळे, माजी नगरसेवक सागर चाळके, संजय कांबळे, राहुल खंजिरे, नितीन जांभळे, महादेव गौड, आदींची भाषणे झाली.

हातकणंगले लोकसभेची जागा शिवसेनेकडे असली तरी इंडिया आघाडीकडून जो उमेदवार देण्यात येईल, त्याच्या पाठीशी एकत्रितपणे राहण्याची ग्वाही यावेळी सर्वांनी दिली. केंद्रातील भाजप सरकारच्या धोरणांवरही जोरदार टीका केली. भावनिक प्रचाराला बळी न पडता मूलभूत विकासाच्या प्रश्नावर ही निवडणूक होण्यासाठी प्रयत्न करावेत, असे आवाहन केले.

फेब्रुवारीत घोरपडे नाट्यगृहात व्यापक मेळावा घेण्याची घोषणा केली. यावेळी संजय चौगुले, वैभव उगळे, सयाजी चव्हाण, माकपचे दत्ता माने, शेकापचे शिवाजी साळुंखे, भाकपचे हणमंत लोहार, माजी नगरसेवक प्रकाश मोरबाळे, उदयसिंह पाटील, अमरजित जाधव उपस्‍थित होते. प्रमोद खुडे यांनी सूत्रसंचालन केले. तल सदा मलाबादे यांनी आभार मानले.

खासदार, आमदारांवर टीका

खासदार धैर्यशील माने व आमदार प्रकाश आवाडे यांनी साडेचार वर्षांत कोणत्याही मूलभूत प्रश्नांना हात घातलेला नाही. अनेक प्रश्न प्रलंबित आहेत. त्यामुळे आगामी निवडणुकांमध्ये त्यांना मतदार घरी बसवल्याशिवाय राहणार नाहीत, असा विश्वास बावचकर यांनी व्यक्त केला.