कोल्हापूर  : शासनाने दिलेल्या आदेशानुसार पश्चिम महाराष्ट्र देवस्थान समितीच्या अखत्यारीतील करवीर निवासिनी अंबाबाई, दख्खनचा राजा जोतिबा मंदिरासह सर्व मंदिरे 30 एप्रिलपर्यंत भाविकांना दर्शनासाठी बंद राहणार आहेत. त्याशिवाय 26 एप्रिलला होणारी जोतिबाची चैत्री यात्राही रद्द करण्यात आली आहे. मात्र, या काळात सर्व धार्मिक विधी मोजक्‍याच पुजारी व सेवेकरी यांच्या उपस्थितीत होतील, अशी माहिती देवस्थान समितीचे अध्यक्ष महेश जाधव यांनी आज दिली. 

वाढत्या कोरोनाच्या पार्श्‍वभूमीवर शासनाने सर्व धार्मिक स्थळे बंद ठेवण्याचे आदेश दिल्यानंतर आज समितीच्या कार्यालयात बैठक झाली. या बैठकीत हे निर्णय घेण्यात आले.

जोतिबाच्या चैत्र यात्रेला प्रत्येक वर्षी लाखो भाविक येतात. गेल्या वर्षीही कोरोनामुळे ही यात्रा रद्द करण्यात आली होती. चैत्र यात्रेच्या दुसऱ्या दिवशी 27 एप्रिलला करवीर निवासिनी श्री अंबाबाईचा रथोत्सव होतो. कोल्हापूरकरांचा लोकोत्सव असणाऱ्या या सोहळ्याला हजारो भाविकांची उपस्थिती असते. हा सोहळाही गेल्या वर्षीप्रमाणेच प्रतीकात्मक पद्धतीने साजरा करण्याचा निर्णय या बैठकीत घेण्यात आला.

हेही वाचा- पॅकेजमधील फुलाची पाकळी तरी मिळेल आता याचीच प्रतीक्षा;पंतप्रधान नरेंद्र मोदींवर जयंत पाटीलांनी साधला निशाणा

हेही वाचा- महाविकास आघाडी सरकारची बदनामी मी सहन करणार नाही; हसन मुश्रीफ

संपादन- अर्चना बनगे