कोल्हापूर : जोतिबा डोंगरावरील जोतिबा मंदिर खेट्यांच्या कालावधीत भाविकांना बंद राहणार असून, इतर दिवशी मंदिर दर्शनासाठी खुले राहणार आहे, अशी माहिती पश्‍चिम महाराष्ट्र देवस्थान व्यवस्थापन समितीतर्फे पत्रकाद्वारे देण्यात आली आहे.
पत्रकात म्हटले आहे की, दरवर्षी जोतिबा डोंगरावर रविवारच्या खेट्यांना लाखो भाविक हजेरी लावतात. यंदा २८ फेब्रुवारीपासून जोतिबाच्या खेट्यांना सुरुवात होत आहे. ७, १४, २१ व २८ मार्चला खेटे असणार आहेत.

हेही वाचा - शाब्बास पोरांनो! पन्हाळ्याची मासेमारी आफ्रिका खंडातील पद्धतीशी मिळती-जुळती, विद्यार्थ्यांचे संशोधन -

जिल्हा आपत्ती प्राधिकरणाचे मुख्य कार्यकारी अधिकारी यांनी दिलेल्या आदेशाप्रमाणे कोरोनाच्या प्रादुर्भावामुळे जिल्ह्यात आपत्तीजनक परिस्थिती उद्‌भवू नये, यासाठी २८ पासून खेटे होणार नाहीत. मात्र, पारंपरिक पद्धतीने धार्मिक विधी कमीत कमी मानकरी व पुजारी यांच्या उपस्थित होईल. अन्य दिवशी मंदिर दर्शनासाठी भाविकांना खुले राहणार असले तरी त्यांनी शासकीय नियमांचे पालन करणे आवश्‍यक आहे. मास्क बंधनकारक आहे. सॅनिटायझरचा वापरही आवश्‍यक असून तापमान तपासणी करायची आहे. सुरक्षित अंतर ठेवून मंदिरात प्रवेश दिला जाणार आहे.

संपादन - स्नेहल कदम