शिये (कोल्हापूर) : निगवे दुमाला (ता. करवीर) येथील ग्रामदक्षता समिती व ग्रामपंचायतीच्या वतीने नवरात्र व दसरा उत्सव रद्द करण्याचा निर्णय घेऊन उपवास न करण्याचा निर्णय घेतला आहे. कोरोनाच्या पार्श्वभूमीवर गावात सापडलेले रुग्ण व तिघांचा झालेला मृत्यू गावासाठी धोकादायक आहे. शिवाय सध्या गावामध्ये सर्दी, खोकला, ताप अशा आजारांचे अनेक रुग्ण आहेत. त्यातून कोरोनाचा संसर्ग होण्याची शक्‍यता नाकारता येत नाही. हा संभाव्य धोका ओळखून ग्रामस्थांच्या बैठकीत हा निर्णय झाला आहे. 

हेही वाचा - सीमाभागातील शैक्षणिक संकुलाचे अभ्यासक्रम नव्या वर्षापासून 

याबाबत समितीने विशेष नियमावली जाहीर केली आहे. त्यानुसार गावातील कोणत्याही व्यक्तीने नवरात्र उपवास करण्याचा नाही. नवरात्रात मंदिर बंद राहतील. जागर, सीमोल्लंघन, खंडेनवमीची पालखी निघणार नाही. नवरात्र काळात कोणाचाही नैवैद्य मंदिरात स्वीकारला जाणार नाही. जागरादिवशी कोणत्याही मंदिरात ऊस घेतला जाणार नाही. नवरात्र काळात बाहेरील गावातील लोकांना तेल घालण्यासाठी प्रवेश दिला जाणार नाही. 

मंदिरामध्ये फक्त पाच पुजाऱ्यांव्यतिरिक्त कोणालाही प्रवेश दिला जाणार नाही. गावामध्ये दुर्गामातेची मूर्ती प्रतिष्ठापित करता येणार नाही. बैठकीस प्रशासक संदेश भोईटे, बत्तास चौगले, पंडित लाड, सुरेश पाटील, रणजित पाटील, पांडुरंग रानडे, योगेश कांबळे, अनिल खोत, बंडोपंत जासूद आदी उपस्थित होते. 

हेही वाचा - कोल्हापुरात यंदाचा नवरात्रोत्सव भाविकांविनाच 

संपादन - स्नेहल कदम