कोल्हापूर : पुण्यातील पोर्शे या आलिशान भरधाव कारनं दोघांचा जीव घेतल्याच्या अपघातानं देशाला हादरवून टाकलेलं असतानाच आता कोल्हापुरातील एक भीषण अपघाताचा व्हिडिओ समोर आला आहे. यामध्ये भरधाव वेगात असलेल्या एका कारनं सायबर चौकात चार ते पाच दुचाकींना जोरदार धडक दिली.

ही धडक इतकी भीषण होती की त्यामुळं धडक दिलेल्या दुचाकी उडून इतर दुचाकींना धडकल्या त्यावरील लोकही 'कॅरम बोर्ड' फोडल्याप्रमाणं उडाली. या भीषण अपघातात तीन जणांचा मृत्यू झाला आहे. (Kolhapur accident thrill like carrom board happened on Kolhapur road rash car dash many two wheelers)

सुत्रांच्या माहितीनुसार, कोल्हापुरातील सायबर चौकात हा भीषण अपघात झाला आहे. नेहमीप्रमाणं या चौकात वाहतूक सुरु असताना अचानक एक भरधाव कारनं राजारामपुरीकडून येताना बरोबर चौकामध्येच एकमेकांना क्रॉस होणाऱ्या काही दुचाकींना जोरदार धडक दिली. ही धडक इतकी जबरदस्त होती की कॅरम बोर्डवरील सोंगट्या स्टायकरनं फोडल्यानंतर ज्या पद्धतीनं कॅऱम फुटतो तशी दुचाकीवरील लोक उडाले. या धडकेची तीव्रता सांगताना पहिल्यांदा ज्या दुचाकीस्वारांना धडक बसली त्यावरील लोक दुसऱ्या दुचाकीवर जाऊन धडकले, अशा प्रकारची ही दृश्ये पाहून थरकाप उडाल्याशिवाय राहणार नाही.

या अपघातात तीन जणांचा जागीच मृत्यू झाला असून चार ते पाच जण गंभीर जखमी असल्याची माहिती मिळतेय. यांपैकी दोघांची प्रकृती गंभीर आहे. जखमींवर सीपीआर आणि सिटी रुग्णालयात उपचार सुरू आहेत. राजारामपुरी आणि शिवाजी विद्यापीठ तसंच राजाराम कॉलेजला जोडणारा हा सायबर चौक असून या चौकात मोठी गर्दी असते. या चौकाच्या बाजूला अनेक शाळा आणि सायबर कॉलेजही आहे.

७२ वर्षीय कार चालकाचाही मृत्यू

पोलिसांच्या माहितीनुसार, हर्षद सचिन पाटील (वय १६ रा. कोल्हापूर) आणि एक १९ वर्षाचा तरुण (नाव कन्फर्म नाही) आणि धडक दिलेल्या कारचे चालक वसंत चव्हाण (वय ७२) अशी मृत्यू झालेल्या तिघांची नाव आहेत. यांपैकी वसंत चव्हाण हे शिवाजी विद्यापीठाचे माजी प्र-कुलगुरु होते. चव्हाण यांना भोवळ आल्यानं त्याचं कारवरील नियंत्रण सुटलं आणि हा अपघात झाल्याचं पोलिसांनी सांगितलं. चव्हाण यांना काही आजार होता का? याची माहिती पोलीस त्यांच्या कुटुंबीयांकडून घेत आहेत.