Kolhapur Bandh : औरंगजेबच्या समर्थनाचा स्टेटस् ठेवल्याच्या प्रकरणावरून कोल्हापुरात मोठा तणाव निर्माण झालाय. हिंदुत्ववादी संघटना आक्रमक झाल्या आहेत.

हिंदुत्ववाद्यांनी काल कोल्हापूर बंदची हाक दिली होती. याला आज प्रतिसाद मिळताना दिसत आहे. गेल्या काही दिवसांपासून काही धर्मांधांकडून सोशल मीडियावरुन महापुरुषांची विटंबना सुरु आहे. लव्ह जिहादचे प्रकार वाढत आहेत, तरीही पोलीसांकडून ठोस अशी कारवाई होत नाहीये. त्यामुळं हे प्रकार वाढतच असल्याचं सांगत बंदच्या भूमिकेवर हिंदुत्ववादी संघटना ठाम आहेत.

आज सकाळी 10 वाजता छत्रपती शिवाजी महाराज चौक इथं एकत्र येण्याचं आवाहन बैठकीदरम्यान करण्यात आलं. त्यानुसार हजारोंच्या संख्येनं हिंदुत्ववादी कार्यकर्ते चौकात जमले. पोलिसांनी आंदोलकांना शांत राहण्याचं, तसंच एकाच ठिकाणी आंदोलन करा अशी विनंती केली. मात्र, आंदोलक ऐकण्याच्या मनस्थितीत नव्हते. सकाळपासूनच शहरात ठिकठिकाणी पोलीस तैनात करण्यात आले आहेत.

दरम्यान, कोल्हापुरातील परिस्थिती पोलिसांच्या नियंत्रणाबाहेर गेली आहे. शहरातील अनेक भागात हिंदुत्ववादी कार्यकर्त्यांनी दगडफेक केली असून तणाव निर्माण झाला आहे. कोल्हापूर महानगरपालिका चौकातील रिक्षा हिंदुत्ववादी कार्यकर्त्यांनी फोडली आणि उलटवली.

तर, चप्पल लाईनला असलेलं हॉलिऊड शूजचं दुकान देखील फोडलं. हिंदुत्ववादी कार्यकर्ते शहरभर पसरले आहेत. परिस्थिती नियंत्रणात आणण्यासाठी पोलिसांनी लाठीचार्ज केला. जिल्हा बंदीचा आदेश झुगारून हजारो कार्यकर्ते कोल्हापूरच्या रस्त्यावर उतरले आहेत. मटण मार्केट परिसरात पोलिसांना लाटीचार्ज केला आहे.