नागाव : कोरोनाच्या पार्श्वभूमीवर नागाव येथील आठवडी बाजार तर मौजे वडगावचा उरूस रद्द करण्यात आला आहे. तसेच नागाव येथील जिंदाल ट्रान्सपोर्टचे व्यवस्थापक वीरेंद्र सिंह यादव यांच्या मृत्यूने संपूर्ण जिल्हाभर पसरलेली अफवा आज दुपारी जिल्हाधिकाऱ्यांच्या खुलाशानंतर ग्रामस्थांना दिलासा देणारी ठरली. 

दरम्यान, प्राथमिक आरोग्य केंद्र व नागाव ग्रामपंचायतीने संसर्गजन्य आजाराची काळजी घेत जनजागृती व सर्वेक्षणाचे काम केले. यामध्ये नागाव फाटा व आंबेडकर नगर परिसरात असणाऱ्या अनेक ट्रान्सपोर्ट कार्यालयांना भेटी देऊन कोरोना पार्श्वभूमीवर कोणती काळजी घ्यावी यासंदर्भात मार्गदर्शन केले. आज सोमवार औद्योगिक वसाहतीची सुट्टी असल्यामुळे अनेक ट्रान्सपोर्ट कार्यालय बंद होते. तरीही आरोग्य विभाग व ग्रामपंचायत प्रशासनाने घरोघरी जाऊन यासंदर्भात मार्गदर्शन केले. 

हे पण वाचा - शाळा, कॉलेज बंद... जोतिबा, अंबाबाईच्या दर्शनाला जाणे भाविकांनी टाळावे.... 

जिल्हाधिकाऱ्यांच्या आदेशाचे पालन करत नागावातील सर्व शाळांना ३१ मार्चपर्यंत सुट्टी जाहीर करण्यात आली आहे. तसेच गर्दी टाळण्यासाठी मंगळवारी होणारा आठवडा बाजार ३१ मार्चपर्यंत रद्द करण्यात आला आहे. मौजे वडगाव येथे रविवारपासून सुरू होणारा उरूस रद्द करण्यात आला आहे, अशी माहिती मौजे वडगावचे सरपंच काशिनाथ कांबळे यांनी दिली.

हे पण वाचा - हज यात्रेकरुंसाठी ही आहे दिलासा देणारी बातमी.... 

काल सीपीआरमध्ये मृत्यू झालेले वीरेंद्र सिंह यादव हे ट्रान्सपोर्टमध्ये काम करत होते. त्यांना दम्याचा आजार होता. असे असतानाही कोरोना संशयिताचा मृत्यू अशा अफवेने आज परिसरात घबराट निर्माण झाली होती. मात्र दुपारी जिल्हाधिकारी दौलत देसाई यांनी याबाबत खुलासा केल्यानंतर ग्रामस्थांमध्ये भीती हळूहळू  निवळू लागली.