कोल्हापूर : पहाटे सव्वाचारच्या सुमारास सीपीआरमध्ये आग लागल्याची माहिती देणारा दूरध्वनी जिल्हाधिकारी दौलत देसाई यांना आला. आगीची माहिती मिळताच तोंडाला मास्क, अंगात टी शर्ट, हॉफ पॅंट, पायातील चप्पलवर (स्लिपर) सायकलवरूनच जिल्हाधिकाऱ्यांनी अवघ्या १० मिनिटांत सीपीआर गाठले. 

सीपीआरमध्ये पहाटे चारच्या सुमारास आग लागली. व्हेंटिलेटरवर असणारे काही रुग्ण हलविण्यासाठी कर्मचाऱ्यांनी जीवाची बाजी लावली. यातच सव्वाचारला जिल्हाधिकाऱ्यांनाही याची माहिती दिली. माहिती मिळाल्यानंतर जिल्हाधिकारी देसाई यांनी आपल्या वाहनचालकाला फोन करा, त्याला बोलावून घ्या, यात वेळ न घालवता आहे त्या स्थितीच सायकलवरून दीड ते दोन किलोमीटरचा प्रवास करत सीपीआरमधील घटनास्थळी आले.  

हेही वाचा - Kolhapur CPR Fire Update : मेन स्विच बंद केला नसता तर... 

शॉर्टसर्किटने व्हेंटिलेटर मशीनला आग लागल्याचे कळताच त्यांनी क्षणाचाही विलंब न लावता सीपीआरमध्ये आल्यानंतर तत्काळ रुग्णांची माहिती घेतली. ज्या रुग्णांना ऑक्‍सिजन लावला होता, त्यांना ऑक्‍सिजनपुरवठा होता काय? याचीही पाहणी केली. डॉक्‍टरांकडून त्यांच्या प्रकृतीचीही विचारणा केली. सुमारे तासभर ते तिथेच थांबून राहिले.

सर्व परिस्थिती आटोक्‍यात आल्यानंतर ते पुन्हा सायकलवरूनच घरी गेले. जिल्हाधिकारी सायकलवरून आल्याचे पाहून तिथेल वॉर्डबॉयसह इतर कर्मचाऱ्यांनी आश्‍चर्य व्यक्त केले. तसेच, जिल्हाधिकारी असूनही कोणत्याही प्रोटोकॉल सांभाळण्यात वेळ न घालवता सायकलवरून आल्याचे कौतुकही तिथे असणाऱ्या ज्येष्ठ नागरिकांनी केले.

हेही वाचा -  ह्रदयद्रावक! आयुष्यभर एकमेकांना साथ दिलेल्या दाम्पत्याचा शेवटही सोबतच

संपादन - स्नेहल कदम