कोल्हापूर : शेती उत्पन्न बाजार समितीकडे आर्थिक येणे-देणे नसल्याचे दाखले बेकायदेशीरपणे देऊ नयेत, असा अर्ज दोन व्यक्तींनी जिल्हा सहकार निबंधकांना दिला आहे. त्याची दखल घेत जिल्हा निबंधकांनीही बाजार समितीला या अर्जाची दखल घेऊन कार्यवाही करण्याच्या सूचना दिल्या आहेत. त्यामुळे बाजार समितीचे देणेकरी असलेल्यांना निवडणूक लढविणे मुश्कील होणार आहे.

शेती उत्पन्न बाजार समितीच्या निवडणुकीसाठी उमेदवारी अर्ज भरताना बाजार समितीकडे काहीही अर्थिक येणे-देणे नाही अशा आशयाचा दाखला घ्यावा लागतो. मात्र, बाजार समितीत गेल्या वीस वर्षांत अनेक गैरव्यवहार झाले.

त्याच्या नुकसानीची वसुली झालेली नाही, अशा संचालकांनी यंदाच्या निवडणुकीसाठी बाजार समितीकडून येणे-देणे नसल्याचा दाखला मिळवण्यासाठी प्रयत्न सुरू केले आहेत. त्या संचालकांनी वसुलीची रक्कम न भरता असे दाखले देऊ नयेत, अशी मागणी संबंधित अर्जात आहे. तसेच वसुली रक्कम भरलेली नसतानाही असे बेकायदेशीरपणे दाखले देणाऱ्यांवर फौजदारी कारवाई करण्यात येईल, असाही इशारा अर्जात आहे.

दरम्यान, गेल्या बाजार समितीत तीन संचालक मंडळांच्या काळात गैरव्यवहाराचे आरोप झाले. चौकशी अहवालात गैरव्यवहार उघड झाले. त्याची नुकसानभरपाई संबंधित संचालकांकडून वसूल करणे अद्यापि प्रलंबित आहे.

असे असताना त्याच संचालक मंडळातील अनेकांनी यंदाच्या निवडणुकीत उमेदवारी अर्ज भरला आहे. तर काहीजण अर्ज भरण्याच्या तयारीत आहेत. अशांना बाजार समितीचे देणे नसल्याचा दाखला मिळवण्यासाठी काहीजणांचा खटाटोप सुरू आहे. यात सहकार निबंधकांकडूनही वरील सूचना आल्याने वसुली रक्कम न भरलेल्या माजी संचालकांच्या उमेदवारी धोक्यात येण्याचा संभव आहे.