कोल्हापूर : कासारवाडी (ता. हातकणंगले) येथील एका हॉटेलमध्ये वेश्‍या व्यवसायासाठी तरुणी पुरविणाऱ्याला पोलिसांनी अटक केली. संशयित हनुमंत दिलीप खर्जे (रा. राजेंद्रनगर, कोल्हापूर) असे त्याचे नाव आहे.

अनैतिक मानवी व्यापार प्रतिबंधक विभागाच्या पथकाने ही कारवाई केली. कासारवाडी (ता. हातकणंगले) येथील एका हॉटेलमध्ये आज दुपारी ही कारवाई झाली. शाहूपुरी पोलिस ठाण्यात त्याच्याविरोधात गुन्हा दाखल असल्याने पथकाने त्याचा ताबा शाहूपुरी पोलिसांकडे दिला

पोलिसांनी सांगितले की, जिल्ह्यात काही लॉज, मसाज सेंटरला वेश्या व्यवसायासाठी तरुणी पुरवल्या जात असल्याची माहिती पथकाला मिळाली होती. त्यानुसार शोध घेतला असता, राजेंद्रनगर येथील हनुमंत खर्जे हा त्याच्या रिक्षातून काही तरुणी पुरवत असल्याची माहिती मिळाली.

त्यानुसार त्याच्यावर कासारवाडी येथे आज दुपारी कारवाई केली. अनैतिक मानवी व्यापार प्रतिबंधक विभागाच्या सहायय्क पोलिस निरीक्षक श्रद्धा आंबले-बरगे यांनी ही माहिती दिली.

दरम्यान, शिरोळ तालुक्यातून एका अल्पवयीन मुलीचे अपहरण करणाऱ्या महिलेसही पथकाने ताब्यात घेऊन, पीडित मुलीची सुटका केल्याचेही पथकाकडून सांगण्यात आले. एका अल्पवयीन मुलीचे अपहरण केल्याचा गुन्हा कुरुंदवाड पोलिस ठाण्यात दाखल होता.

त्यानुसार अनैतिक मानवी व्यापार प्रतिबंधक विभागाने येथील मध्यवर्ती बसस्थानक परिसरात एका महिलेस ताब्यात घेतले. नफिसा समीर दानवाडे (रा. गोकुळ चौक, इचलकरंजी) असे तिचे नाव आहे. पुढील कार्यवाहीसाठी तिचा ताबा कुरुंदवाड पोलिसांकडे देण्यात आला आहे.