कोल्हापूर : जिल्ह्यात पुराची आपत्ती निर्माण झाल्यास त्याच्या व्यवस्थापनासाठी जिल्हा आणि महानगरपालिका प्रशासन तसेच पूरबाधितांच्या मदतीसाठी कोल्हापूर डिझास्टर मॅनेजमेंट ग्रुप (केडीएमजी) सज्ज आहे. या ग्रुपमध्ये कोल्हापुरातील विविध शंभर संस्था संघटित झाल्या आहेत. सुमारे ३५० स्वयंसेवकांची टीम मदत कार्यासाठी तयार आहे.

कोल्हापुरात सन २०१९ मधील महापुराच्या आपत्तीवेळी ‘केडीएमजी’ची स्थापना झाली. त्यामध्ये कोल्हापूर चेंबर ऑफ कॉमर्स अँड इंडस्ट्रीज, मेडिकल असोसिएशन, केमिस्ट असोसिएशन, क्रिडाई कोल्हापूर अशा १०० संस्था, संघटनांचा समावेश आहे. पूरबाधितांना जेवण, वैद्यकीय सेवा, औषध पुरवठा, स्वच्छता, पडझड झालेल्या घरांची बांधणी आदी विविध स्वरूपातील मदतकार्य या ग्रुपने केले. सन २०२० मधील पूर आणि कोविडच्या कालावधीत देखील मदतकार्य केले.

सध्या कोल्हापूर जिल्ह्यात पावसाचा जोर कायम आहे. पंचगंगा नदीची पाणीपातळी दिवसागणिक वाढत आहे. ते लक्षात घेऊन संभाव्य पूरस्थितीच्या पार्श्‍वभूमीवर मदतकार्यासाठी ‘केडीएमजी’ तयार आहे. दरम्यान, कोल्हापूर हॉटेल मालक संघाने देखील पूरबाधित आणि त्यांच्यासाठी मदतकार्य करणाऱ्या स्वयंसेवकांना जेवण पुरविण्यासाठी ‘सेंट्रल किचन’चा उपक्रम राबविला होता.

यावर्षी देखील गरज निर्माण झाल्यास ‘सेंट्रल किचन’ सुरू करण्याची तयारी केली असल्याची माहिती या संघाचे अध्यक्ष उज्ज्वल नागेशकर यांनी दिली.कोल्हापूर जिल्ह्यात पुराची आपत्ती निर्माण झाल्यास मदतकार्य करण्यासाठी ‘केडीएमजी’ सज्ज आहे. सुमारे ३५० स्वयंसेवकांची टीम तयार आहे.’

इंद्रजित नागेशकर, विश्‍वस्त, केडीएमजी