कोल्हापूर : जिल्ह्याच्या पश्चिमेकडील ग्रामीण भागात पावसाचा जोर चांगला होता. धरणक्षेत्रातही पाऊस झाल्याने नदीची पाणी पातळी वाढली. पर्यायाने यंदाच्या पावसाळ्यात कसबा बावड्यातील राजाराम बंधारा (Rajaram Bandhara Kolhapur) चौथ्यांदा पाण्याखाली गेला.

शहरात मात्र पावसाचा जोर जेमतेमच होता. दुपारी पावसाच्या हलक्या सरी बरसल्या. पावसाळ्याच्या मध्यावरच पावसाने दडी मारल्याने शेतकरी हवालदिल झाला. यंदा श्रावणसरीही यथातथाच बरसल्या. त्यामुळे भात, ऊस या पिकांच्या वाढीवर परिणाम होऊ लागला. मात्र गेल्या दोन दिवसांत पावसाने काही प्रमाणात जोर धरला आहे.

जिल्ह्यातील पश्चिमेकडील तालुक्यांमध्ये पावसाचा जोर वाढला आहे. या पावसामुळे भात आणि उसाला काही प्रमाणात दिलासा मिळाला आहे. जिल्ह्यातील धरणसाठा पर्याप्त भरला असून पुढील काही दिवसांत मोठी धरणेही पूर्ण क्षमतेने भरतील, असा अंदाज आहे. शहरात मात्र पावसाने पाठ फिरवली असून किरकोळ सरींचा अपवाद वगळता सप्टेंबर महिना कोरडाच गेल्याची स्थिती आहे.