कोल्हापूर - ब्रम्हपुरी येथील हॉली इव्हेंजलिस्ट चर्चच्या मालकीच्या पॅरिश हॉल येथे सुरू असलेले बेकायदा बांधकाम शिवसेनेने आज बंद पाडले. संबंधित ट्रस्टशी संबध नसणाऱ्या व्यक्तीकडून बांधकाम सुरु असल्याचे शिवसेनेचे म्हणणे आहे. संबधित ट्रस्टच्या स्थानिक व्यवस्थापनाने आणि स्थानिक ख्रिश्‍चन समाज बांधवांनी वेळोवेळी प्रशासनाकडे दाद मागितली होती. 

स्थानिकांनी राज्य नियोजन मंडळाचे कार्यकारी अध्यक्ष राजेश क्षीरसागर यांची भेट घेवून न्याय देण्याची विनंती केली. त्यानुसार उत्तरचे शहरप्रमूख रविकिरण इंगवले यांच्या नेतृत्वाखाली आंदोलन करण्यात आले. संतप्त झालेल्या स्थानिक महिलांनी बेकायदेशीर काम करणाऱ्या कंत्राटदाराच्या कार्यालयास टाळे ठोकले. 

यावेळी इंगवले म्हणाले, हॉली इव्हेंजलिस्ट चर्च व पॅरिश हॉल असून या चर्च व हॉलचा वापर धार्मिक व सामाजिक कार्याकरिता नित्यनियमाने केला जातो. या मिळकतीमधील पॅरिश हॉल येथे ट्रस्टशी काही संबध नसणाऱ्या व्यक्तीकडून दुरुस्तीचे काम सुरु आहे. याबाबत संबधित ट्रस्टच्या स्थानिक व्यवस्थापनाने जिल्हा पोलिस प्रशासनासह लक्ष्मीपुरी पोलिसात तक्रार दिली. याविरोधात दाखल तक्रारी बाबत अद्याप कोणतीही कारवाई करण्यात आलेली नाही. त्यामुळे हा प्रश्न शिवसेना स्टाईलने सोडविला जाईल. 

यावेळी बेकायदेशीर काम करणाऱ्या ठेकेदारास कागदपत्रे दाखविण्याच्या सूचना केल्या. परंतु, त्यांच्याकडे बांधकाम परवानगीची कोणतीही कागदपत्रे उपलब्ध नव्हती. महिलांनी आक्रमक होऊन कंत्राटदारास काम बंद करण्यास भाग पाडले. 

हे पण वाचा -  कोल्हापूर : जयसिंगरपूरमध्ये शिक्षिका पॉझिटीव्ह; १२० विद्यार्थी क्वारंटाईन

यावेळी सुशील भांदिगरे, शाखाप्रमुख कपिल नाळे, सचिन क्षीरसागर, कल्पेश नाळे, राजू कुंडले, बबन शिंदे, शिला चिंचलीकर, अबिगेल भोसले, रिबेका महाजन, अर्चना खोडवे, वैशाली भोसले, प्राची वायदंडे, शकिला लोखंडे, अरुण सावंत, संदीप आवळे, प्रफुल्ल महाजन, महेश भालेराव, संजय भोसले, संजय आवळे, विनोद लोखंडे आदी आंदोलनात सहभागी झाले. 

 संपादन - धनाजी सुर्वे