कोल्हापूर : गुटखा तस्कर करण्यात सक्रिय असणाऱ्या जयसिंगपुरातील ‘एमडी गॅंग’चा मुख्य सूत्रधार महेश दळवीसह ११ जणांवर मोकांतर्गत कारवाई केली. या प्रस्तावास विशेष पोलिस महानिरीक्षक डॉ. सुहास वारके यांनी मंजुरी दिली. गुटका तस्करीअंतर्गत राज्यात अशा पद्धतीची ही पहिलीच कारवाई ठरली. 
महेश बजरंग दळवी (रा. दानोळी, ता. शिरोळ), जुबेर अहमद शेख (रा. बंगळूर) इम्रान अल्ताफ पाशा ( रा. बंगळूर), अशरफ अली उस्मान अली ( रा. नागपूर), मोहंमद साजिद अब्दुल जब्बार पटनी (रा. औरंगाबाद), अभिनंदन ऊर्फ अभ्या राजकुमार पाटील धडेल  
( रा. कोथळी), समीर जहाँगीर पट्टेकरी (रा. इचलकरंजी), भरतेश सिद्राम कुडचे (रा. मिरज), महंमद जुनैद अब्दुल गफार दिवाण (रा.नागपूर), रणजित प्रकाश मिसाळ (रा. मिरज), अमर भिमसिंग रजपुत (रा. जयसिंगपूर ) अशी मोकांतर्गत कारवाई केलेल्या संशयितांची नावे आहेत. 

याबाबत पोलिसांनी दिलेली माहिती

जानेवारी महिन्यात चाँदपाशा सनाऊल्ला (रा. बंगळूर) यांनी दिलेल्या फिर्यादेनुसार जयसिंगपूर पोलिस ठाण्यात एमडी गॅंगवर गुन्हा दाखल झाला होता. चाँदपाशा त्यांचा मित्र नरसिंह मूर्ती हे दोघे बंगळूर येथे राहतात. त्या दोघांनी १५० गुटखाच्या बॅगा कंटेरनमधून अथणी (बेळगाव) येथे घेऊन जात होते. कंटेनरमधील १५० पैकी ५३ बॅगांची चोरी झाली होती. सदरची चोरी ही सनाउल्ला, त्याचा मित्र नरसिंह मूर्ती व अर्जुन या तिघांनी केल्याचा संशय एमडी गॅंगला आला होता.

हेही वाचा- ब्रेकिंग - दख्खनचा राजा श्री जोतिबा देवाची चैत्र यात्रा अखेर रद्द...

त्यानंतर गॅंगने त्या तिघांना वेगवेगळ्या ठिकाणी डांबून घालून हत्यारांनी मारहाण केली व वीजेचा शॉक देऊन छळ केला. त्यात अर्जूनचा मृत्यू झाला होता. या गॅंगने पुरावा नाहीसा करणे, मृतदेहाची व मुद्देमालाची विल्हेवाट लावण्याचा प्रयत्न केल्याची फिर्याद सनाऊल्लाने दिली होती. त्यानुसार टोळीवर गुन्हा दाखल झाला होता. यातील संशयित महेश दळवी, अभिनंदन धडेल व समीर पट्टेकरी या तिघांना अद्याप अटक केलेली नाही. 

 हेही वाचा-ब्रेकिंग - अखेर अंबाबाई मंदिर दर्शनासाठी बंद...

गॅंगवर मोका अंतर्गत कारवाई
गुन्ह्याची पार्श्‍वभूमी लक्षात घेवून पोलिस अधीक्षक डॉ. अभिनव देशमूख यांनी तपासाचे आदेश जयसिंगपूर पोलिस उपअधीक्षक किशोर काळे यांना दिले. तपासात गुटखा व्यवसायातील आंतरराज्यीय संघटित गुन्हेगारीचा व आर्थिक लाभातून निर्माण केलेल्या वर्चस्वाचा लेखाजोखा पुढे आला. ‘एमडी गॅंग’वर जयसिंगपूर, शिवाजीनगर, राजारामपुरी, सांगली ग्रामीण, सांगली शहर, मिरज शहर, नागपूर शहर आणि अन्न औषध प्रशासन येथे गंभीर व दखलपात्र असे २१ गुन्हे दाखल असल्याची माहिती पुढे आली. त्यानुसार उपअधीक्षक काळे यांनी या गॅंगवर मोका अंतर्गत कारवाईचा प्रस्ताव तयार करून तो पोलिस अधीक्षक कार्यालयाकडे सादर केला. त्यास विशेष पोलिस महानिरीक्षक वारके यांनी मंजुरी दिल्याचे पोलिस निरीक्षक तानाजी सावंत यांनी सांगितले. 

कर्नाटक, गोवा, आंध्रप्रदेश, दीव-दमण आदी राज्यासह केंद्र शासीत प्रदेशातून राज्यात अवैध व्यवसायाचे संचन करणारे व संघटित गुन्हेगारी करणाऱ्या समाजकंटकांवर येथून पुढे कडक कारवाई करण्यात येईल. 
- डॉ. अभिनव देशमुख, पोलिस अधीक्षक