म्हाकवे : म्हाकवे व हळदी (ता. कागल) येथे खासदार संजय मंडलिक (Sanjay Mandlik) यांना गावात प्रवेश करताना सकल मराठा समाजाच्या (Maratha Community) कार्यकर्त्यांनी रोखले. ‘खासदारांनी मी मराठाच आहे, मराठा आंदोलनाला दसरा चौकातच पाठिंबा जाहीर केला आहे,’ अशी आपली भूमिका समजून सांगितल्यावर त्यांनी गावात प्रवेश केला.

मराठा आरक्षण मिळाल्याशिवाय राजकीय नेत्यांना गावात प्रवेश बंद केला आहे, अशी भूमिका घेत बिद्री साखर कारखान्याच्यानिमित्ताने प्रचार बैठकीसाठी आलेल्या खासदार संजय मंडलिक यांना म्हाकवे व हळदी येथील सकल मराठा समाजाच्या कार्यकर्त्यांनी गावात प्रवेश नाकारला.

यावेळी निवडणुकीच्या प्रचारासाठी आला, तसे मराठा आरक्षणासाठी काय केले? असा जाब विचारल्यावर खासदार मंडलिक म्हणाले, ‘२४ तारखेपर्यंत मराठा आरक्षणाचा प्रश्न सोडवू असे मुख्यमंत्र्यांनी सांगितले आहे. तोपर्यंत कुणावरच गावबंदी केलेली नाही. मीसुद्धा मराठा आहे. मी मराठा आंदोलनाला पाठिंबा दसरा चौकातच जाहीर केला आहे. याबद्दल माझी राजीनामा देण्याची तयारी सुद्धा मी दर्शवलेली आहे.’

हळदी येथील सकल मराठा समाजाचे कार्यकर्ते संतोष पवार, उत्तम व्हरांबळे, सुनील गोरुले, अक्षय चव्हाण, सुनील सावरतकर तर म्हाकवे येथील प्रदीप पाटील,विकास पाटील, पंढरीनाथ पाटील, रामदास पाटील, राजेंद्र पाटील या सकल मराठा समाजाच्या कार्यकर्त्यांनी खासदार संजय मंडलिक यांचा ताफा अडवला.