कोल्हापूर : गोवा विद्यापीठात छत्रपती शिवाजी महाराज अध्यासन केंद्र उभारण्याची मागणी खासदार युवराज संभाजीराजे छत्रपती यांनी गोव्याचे मुख्यमंत्री प्रमोद सावंत यांच्याकडे आज केली.नवीन विद्यार्थी, अभ्यासक आणि इतिहासकारांना त्याचा लाभ होईल, असे त्यांनी सांगितले. गोव्यात जाऊन त्यांनी मुख्यमंत्री सावंत यांची भेट घेतली.

यावेळी मुख्यमंत्री सावंत यांनी मागणी अगदी रास्त असून, त्याबाबत लवकरच निर्णय घेऊ, अशी ग्वाही दिली. रायगड विकास प्राधिकरणाला, गोवा सरकारने पोर्तुगीज कागदपत्रे, पत्रव्यवहार आणि संदर्भग्रंथ याबाबत सहकार्य करण्याची विनंती करण्यात आली. गोव्याचे पोर्तुगीज आणि मराठा सत्तांमध्ये नेहमी संघर्ष राहिला होता. व्यापारी संबंध देखील होते. त्यामुळे अनेक पत्रव्यवहार झाले होते. त्यातून रायगड संबंधातील काही नोंदी सापडतील का? हा प्रमुख उद्देश आहे. तसे थेट पुरावे सापडले तर, रायगड संवर्धन कार्यात त्याचा उपयोग होईल, असे संभाजीराजे यांनी स्पष्ट केले.

हेही वाचा- कोजागिरीच्या रात्री शिवसेनेची धावपळ -

मुख्यमंत्री सावंत यांनी पोर्तुगीज, मराठी किंवा इंग्रजी जाणणारे लोक आहेत. त्यांच्या माध्यमातून प्राधिकरणाला सर्व ती कागदपत्रे उपलब्ध करून देऊ. गोव्यात छत्रपती शिवाजी महाराज आणि छत्रपती संभाजी महाराजांच्या अधिपत्याखालील किल्ल्यांचे संवर्धन करत आहोत. अनेक ठिकाणी स्मारके उभी करण्यास सुरुवात केली आहे. किल्ले संवर्धन आणि जतन यामध्ये तुमचे योगदान मोठे आहे. तुमच्या अनुभवाचा लाभ गोवा सरकारला सुद्धा झाला पाहिजे, अशी अपेक्षा व्यक्त केली.संभाजीराजे छत्रपती यांनी मुख्यमंत्र्यांना किल्ले संवर्धनाचे काम एकत्र येऊन काम करण्यासह सहकार्य करण्याची भूमिका मांडली.

संपादन - अर्चना बनगे