इचलकरंजी : महाविद्यालयास येत असताना एसटी बसमध्ये टवाळखोरी करणार्‍या शिरोळ तालुक्यातील 22 युवकांना निर्भया पथकाने थेट पोलिस ठाण्यात नेले. संबंधीत सर्व युवकांच्या पालकांना बोलवून समज दिल्यानंतर त्यांना सोडण्यात आले. मात्र एसटीमध्ये टवाळखोरी करणार्‍या युवकांना चांगलाच चाप बसल्याची चर्चा आज शहरात होती.

हे पण वाचा -  रंगाचा बेरंग ; हुल्लडबाजांमुळे या शहरात तणाव

दरम्यान, एसटीमध्ये टवाळखोरी करणार्‍या युवकांबाबत वाहकाने घेतलेल्या धाडसी निर्णयाचे कौतुक होत आहे. यापुढील काळातही चालक वाहकांबरोबर महाविद्यालयीन युवतीने तात्काळ निर्भया पथकाशी संपर्क साधल्यास अशा घटनांना आळा बसणार आहे. 
शिरोळ तालुक्यातील दत्तवाड, घोसरवाड, अब्दुललाट, शिरदवाड या मार्गावरून दररोज सकाळी बस येते. यामध्ये अधिकांश शाळकरी व महाविद्यालयीन युवक युवतींचा समावेश असतो. मुलांनी बसमध्ये आल्यानंतर दंगामस्ती करण्यास सुरवात केली. मुलींची छेडछाड करणे, बसमधील बेल वारंवार वाजविणे, विक्षिप्तपणे वर्तणूक करणे असे प्रकार सर्रासपणे सुरू होते. ही बाब वाहकाच्या लक्षात आल्यानंतर त्याने हेल्पलाईन नंबरवर संपर्क साधला. 

हे पण वाचा - त्या कर्मचाऱ्यांच्या नोकरीवर टांगती तलवार.....

बस मध्यवर्ती स्थानकावर आल्यानंतर त्या ठिकाणी निर्भया पथकच्या प्रमुख सहाय्यक पोलिस निरिक्षक रूपाली पाटील यांच्या नेतृत्वाखाली कुमक थांबून होती. बसमध्ये दंगा करणार्‍या युवकांना तात्काळ त्यांनी ताब्यात घेतले आणि थेट पोलिस स्टेशन गाठले. संबंधीत सर्व युवकांच्या पालकांना पोलिस ठाण्यात बोलवून घेण्यात आले. यावेळी पोलिसांनी या युवकांना सज्जड दम देऊन पुन्हा असा प्रकार झाल्यास कडक कारवाईचा इशारा दिला. या कारवाईमध्ये अविनाश भोसले, व्ही. एम. शिंदे, एम. आर. कुलकर्णी, जे. एस. अकिवाटे यांनी भाग घेतला.

बसमध्ये युवकांनी छेडछाड अथवा अन्य प्रकार केल्यास तात्काळ निर्भया पथकास कळवावे. या युवकांच्यावर तातडीने कारवाई करण्यात येईल. त्याचबरोबर अशा प्रकारांना आळा घालण्यास यापुढील काळात ठोस पाऊले उचलली जातील.
-रूपाली पाटील, निर्भया पथक प्रमुख