जयसिंगपूर : सांगली ‘हानगरपालिका क्षेत्रातील दवाखाने सुरु ठेवावीत असे आदेश आयुक्तांनी दिले आहेत. मात्र, जिल्हा बंदीचा फटका कोल्हापूर जिल्ह्यातील नजीकच्या गावातील डॉक्टरांना बसत असून पोलिस डॉक्टरांनाच प्रवेश देत नसल्याने कुणाचा आदेश पाळायचा असा संभ्रम अर्जुनवाड (ता. शिरोळ) येथील डॉक्टरांमध्ये निर्माण झाला आहे. 

मिरज तालुक्यातील कृष्णाघाट आणि अर्जुनवाडमधील अंतर केवळ अर्धा किमीचे आहे. कृष्णाघाट सांगली जिल्ह्यात तर अर्जुनवाड कोल्हापूर जिल्ह्यातील शिरोळ तालुक्यात येते. कोरोनाच्या पाश्र्वभूमीवर लॉकडाऊनच्या काळात जिल्ह्यांच्या सिमा बंद करण्यात आल्या. याचा फटका प्रामुख्याने डॉक्टरांना बसला आहे. शासन म्हणते दवाखाने सुरु ठेवा. मात्र, पोलिसांकडून प्रवेश बंदीमुळे डॉक्टरांना दवाखान्यात सेवा बजावण्यात अडचणी येत आहेत. कोरोनाच्या पाश्र्वभूमीवर सध्या सर्वत्र भितीचे वातावरण आहे. अशा स्थितीत शहरी आणि ग्रामीण भागातील दवाखाने नियमीत सुरु राहिले पाहिजेत अशी शासनाची भूमिका आहे. 

अर्जुनवाडमधून कृष्णाघाटावर जाणाऱ्या डॉक्टरांनाच रोखण्यात आले आहे. यामुळे शासनाचा आदेश पाळायचा की पोलिसांशी हुज्जत घालायची, अशी डॉक्टरांची डोकेदुखी बनली आहे. वास्तविक डॉक्टरांना सेवा बजावता यावी यासाठी पोलिसांकडून सहकार्याची गरज असताना डॉक्टरांनाच रोखून पोलिस आपले काम किती प्रामाणिकपणे पार पाडत आहेत हे अर्जुनवाडमधील बंदोबस्तावर असणाऱ्या शिरोळ पोलिसांकडून दिसत आहे. उपविभागीय पोलिस अधिकारी किशोर काळे यांनी यामध्ये लक्ष घालून कृष्णाघाटावर सेवा बजावणाऱ्या डॉक्टरांना प्रवेशास मुभा मिळण्यासाठी प्रयत्न व्हावेत अशी मागणी होत आहे. 

हे पण वाचा - कोरोनाशी लढणार आता ही गोळी 

जिल्हा एक; धोरणे दोन 

उदगाव टोलनाक्यावरुन सांगली, मिरजेकडे जाण्यासाठी डॉक्टरांना प्रवेश दिला जातो. मात्र अर्जुनवाडधून केवळ अर्धा किमी अंतरावरील दवाखान्यात जाण्यासाठी डॉक्टरांना मज्जाव केला जात आहे. एकाच जिल्ह्यात कोल्हापूर पोलिस प्रशासनाकडून दुटप्पी भूमिका घेतली जात असल्याने नाराजी व्यक्त केली जात आहे. 

हे पण वाचा -  का केली जाते पावसाळ्या पूर्वी जोतिबा मंदिराच्या शिखरांची रंगरंगोटी?