सांगली : दूधगाव (ता. मिरज) येथे कोरोना बाधित वडिलांची आत्महत्या आणि पाठोपाठ तरुण मुलाचा कोरोनाने मृत्यू झाल्याच्या घटनेने संपूर्ण जिल्हा हादरून गेला आहे. मानवी मनाला वेदना देणारी ही घटना आहे, त्याने सारेच सुन्न आहे. दवाखान्याचे बिल कसे भागवू, साऱ्यांना कसे वाचवू, या विवंचनेत एका बापाला गळफास घ्यावा लागला, हेच दुर्दैवी आहे. कोरोनाचे संकट भले मोठे आहे, मात्र त्यातून आपण वाचू शकतो, हा भरवसा लोक हरवत चालले आहेत.

हेही वाचा - पलूस तालुक्‍यात लवकरच 50 बेडचे कोविड हॉस्पिटल  

कोरोनामुक्त झालेल्या लोकांची संख्या आठ हजारांवर आहे. लोक लढाई जिंकत आहेत. १०० वर्षे पार केलेल्या एका गृहस्थाने कोरोनाला हरवले, ८४ वर्षाची आजी कोरोनामुक्त झाली. थोडा धीर धरण्याची, संयमाने वागण्याची ही वेळ आहे, मात्र आर्थिक तणावाखाली टोकाचे पाऊल उचलले जात आहे. काही ठिकाणी रुग्णालयात दाखल करून घ्यायला दीड लाख रुपयांचे डिपॉझिट मागितले जात आहे. काहीजण ५० हजार तर काहीजण एक लाख रुपये मागत आहेत. 

काही ठिकाणी दिवसाचा उपचार शुल्क दहा हजार रुपये आहे. या चर्चांनी रुग्णाला तणाव नाही आला तर आश्‍चर्य आहे. या स्थितीत घरातील कुणी कोरोना बाधित झाला तर पायाखालची वाळू सरकते, असा अनुभव आहे. या साऱ्यावर कुणाचे नियंत्रण राहिलेले नाही का, असा सवालही आता चर्चेत आहे.

हेही वाचा - तुम्ही डिजिटल साक्षर आहात; पुढील जनगननेत असेल रकाना?

मिरजेतील कोविड रुग्णालय, सांगलीत वसंतदादा शासकीय रुग्णालय आणि जिल्हा प्रशासन, महापालिकेने सुरु केलेली काही मोफत कोविड सेंटर आहे. ती फुल्ल आहेत. खासगी रुग्णालयात कोविड सेंटर सुरु करण्यात आली आहे, मात्र कोरोना रुग्णांची संख्या प्रचंड वाढली आहे. त्यामुळे बेड उपलब्ध होईल का, याचीही चिंता वाढली आहे. 

संपादन - स्नेहल कदम