बेळगाव - जिल्ह्यात दोन दिवसांत सात नवीन रुग्ण आढळल्यामुळे अख्खा जिल्हा ढवळून निघालेला असताना बेळगाव तालुका पीरणवाडीत आणखी एक कोरोना पॉझिटिव्ह आज (ता.14) आढळला. नवीन बाब म्हणजे कुडची आणि हिरेबागेवाडीत पॉझिटिव्ह रुग्ण आढळून येत होते. पण, आज पिरणवाडीत रुग्ण आढळून आला आहे. बाधित फेब्रुवारी महिन्यांत दिल्लीहून परतला होता. होम क्वारंटाईन केले होते. अहवाल पॉझिटिव्ह आल्यानंतर कोरोना कक्षात दाखल केले आहे.

पीरणवाडीतील तरुण फेब्रुवारी महिन्यांत दिल्ली प्रवास केला होता. त्यानंतर निझामुद्दिनमधील तबलिगी मरकजची घटना उघडकीस आली. संशयित रुग्णांची माहिती घेतली. त्यामध्ये बेळगाव तालुक्‍यातील पिरणवाडीमधील 33 वर्षिय तरुणाने दिल्ली प्रवास केल्याची माहिती पुढे आली. त्याला होम क्वारंटाईन केले. अहवाल प्रयोगशाळेला दिला. तपशिल आज (ता.14) उपलब्ध झाला. अहवाल पॉझिटिव्ह प्राप्त झाला. प्रशासन खडबडून जागे झाले. बाधितांचा किती जणांशी संपर्क आला. त्यांच्यात लक्षणे दिसत आहेत का? हे  तपासण्यासाठी कुटूंबिय, नातेवाईकांना क्वारंटाईन केले आहे.

वाचा - सावधान ! लोकांना मदत करून फोटो सेशन करताय ? तर तुमच्यावर होणार गुन्हा दाखल... 

जिल्ह्यात दोन दिवसांमध्ये सात नवीन रुग्णांची भर पडली. पैकी सहा कुडची आणि एक हिरेबागेवाडीतील आहे. त्यामध्ये आज एकाची भर पडल्यामुळे बाधितांची संख्या 18 झाली. कॅम्प येथे एक, बेळगुंदीत एक, हिरेबागेवाडीत पाच आणि कुडचीत सर्वाधिक दहा रुग्ण मिळून 17 कोरोना संसर्ग आहेत. त्यामध्ये पिरणवाडी येथील एकाची भर पडल्यामुळे बाधित रुग्णांची संख्या अठरा झाली आहे. जिल्हाधिकारी एस. बी. बोम्मनहळ्ळी आज (ता.14) सायंकाळपर्यंत पिरणवाडीला निर्बंधित क्षेत्र (झोन) म्हणून घोषित करण्याची शक्‍यता आहे.