मुरगूड (कोल्हापूर) : धिप्पाड पण तितकीच पिळदार शरीरयष्ठी, बघता क्षणीच डोळ्यात भरेल असं देखणं रुप, पाऊस लागणार काय..? कोरोना जाईल काय...? यांसारख्या अनेक प्रश्नांची उत्तरे देत लहान मुलांना खेळवणारा. कोणतीही इजा न पोहचविता मनोरंजन करणारा नंदीबैल ग्रामीण भागात येत आहे. गेल्यावर्षी कोरोनामुळे येऊ न शकलेला नंदीबैल दोन वर्षानंतर आता पुन्हा गावात दाखल झाला आहे.

पोटाची खळगी भरण्यासाठी प्रत्येकाला कष्ट करावेच लागतात. पण त्यात हा 'अर्जुन' नावाचा नंदीबैलही कमी नाही. गेली 27 वर्षे मालकासोबत दरमजल अनेक गावांत तो फिरत आहे. प्रत्येकाला सुखी ठेवणारा आशिर्वाद देणारा हा भरदार 'अर्जुन' कुरुकलीसह परिसरात दारोदारी येत आहे. त्याच्या येण्याने बालचमुंच्या आनंदात भर पडली आहे. वाद्यसह नंदीबैलाची फेरी महिला वर्गासाठी श्रध्देची ठरत आहे. अंगणात आलेल्या नंदीचे महिला औक्षण करतात. त्याच्याकडे कुटुंब परिवाराच्या संरक्षणासह सुखी संसाराचे दान मागतानाचे चित्र दिसत आहे. ग्रामीण भागात या नंदीकडे श्रध्देच्या भावनेने पाहिले जाते. 

हेही वाचा - आम्हाला होत नाही, मुलांनो घरी या; परदेशातील मुलांना वृद्ध पालकांची हाक

बारामती जिल्ह्यातील जळूची येथील गणेश पोवार, अक्षय भंडारे, सखाराम विठोबा गदाई हे नंदी घेवून भटकंती करत आहेत. लोकांचे चेहरे वाचण्याची उत्तम कला त्यांच्याकडे असल्याचे ते सांगतात. नंदीच्या औक्षणसाठी ठिकठिकाणी गर्दी दिसते. एकंदरीत त्यांचा पोट भरण्याचा हा व्यवसाय असला तरी कोरोनाच्या महामारीच्या पार्श्वभूमीवर नंदीबैलाची फेरी ग्रामीण भागाच्या संस्कृतीला नवी झळाळी देवू पाहत आहे.

अर्जुन आणि सिनेमा.....

'अर्जुन' नामक नंदीबैल हा बारामतीचा आहे. त्याचे देखणे रुप, भरदार शरीरयष्ठीमुळे अनेक चित्रपटात तो दिसतो. सध्या गोवा येथे चित्रीकरण सुरु असलेल्या 'वाट' या मराठी चित्रपटात त्याने काम केले आहे. त्यामुळे ग्रामीण भागात त्याचे आकर्षण आहे.