कोरेगाव (कोल्हापूर) : महावितरणच्या किन्हई (ता. कोरेगाव) येथील शाखा कार्यालयात अभियंत्याने गळफास घेतल्याचे आज सकाळी निदर्शनास आल्याने खळबळ उडाली. या घटनेमागचे नेमके कारण अद्याप स्पष्ट झालेले नाही. सूरज सुधीर देसाई (वय २५, मूळ रा. सोनाळी, ता. गारगोटी, सध्या रा. एकंबे रोड, कोरेगाव)

याबाबत ग्रामस्थांकडून मिळालेली माहिती अशी 

पेठ किन्हई येथे महावितरण कंपनीचे शाखा कार्यालय आहे. तेथे सूरज देसाई चार-पाच महिन्यांपूर्वी कनिष्ठ अभियंता म्हणून रुजू झाले होते. दरम्यान, आज सकाळी आठच्या सुमारास शाखा कार्यालयामध्ये सूरज गळफास घेतल्याच्या स्थितीत आढळून आले. माहिती कळवल्यानंतर सातारारोड पोलिस घटनास्थळी दाखल झाले. कोरेगाव पोलिस ठाण्याच्या प्रभारी आयपीएस अधिकारी रितू खोखर देखील तेथे पोचल्या. दरम्यान, या घटनेची माहिती सूरज यांच्या नातेवाईकांना कळवण्यात आली. दुपारी नातेवाईक आल्यानंतर मृतदेह विच्छेदनासाठी पाठवण्यात आला. 
दरम्यान, रविवार असूनही एवढ्या सकाळी शाखा कार्यालयात सूरज गळफास घेतल्याच्या स्थितीत आढळून आले. ही घटना शनिवारी रात्री घडली, की आज सकाळी घडली आणि या घटनेमागचे नेमके कारण काय, हे अद्याप स्पष्ट झालेले नाही. या घटनेची नोंद पोलिस ठाण्यात करण्याचे काम रात्री उशिरापर्यंत सुरू होते.

हेही वाचा- पहिले हिंदकेसरी श्रीपती खंचनाळे यांचे निधन -

शेवटचा संवाद आई-वडिलांशी 
गारगोटी सोनाळीतील सूरज देसाई महावितरणमध्ये दीड वर्षापासून कनिष्ठ अभियंता म्हणून कार्यरत होते. शनिवारी सायंकाळी साडेपाचच्या दरम्यान त्यांचे आई-वडिलांशी दूरध्वनीवरून शेवटचे बोलणे झाले होते. वडिलांनी रात्री नऊपासून अकरापर्यंत पुन्हा त्यांच्याशी संपर्क साधण्याचा प्रयत्न केला; पण संपर्क झाला नाही. सूरज यांच्या मागे आई-वडील व विवाहित बहीण आहे. वडील शेतकरी आहेत. दरम्यान, सूरज यांच्या मृतदेहावर गारगोटीत रविवारी रात्री उशिरा अंत्यसंस्कार करण्यात आले.

खिशात सापडली चिठ्ठी
सूरज यांच्या खिशात चिठ्ठी सापडली; मात्र त्यातील तपशिलाबाबतची माहिती समजू शकली नसल्याची चर्चा ग्रामस्थांमध्ये आहे; परंतु त्याबाबतची अधिकृत माहिती पुढे आली नाही.

संपादन- अर्चना बनगे