कोल्हापूर : विलीनीकरणाच्या मागणीसाठी एसटी कर्मचाऱ्यांनी पुकारलेला संप मिटलेला नाही, संपकाळात एसटीला(msrtc) १२०० कोटींचा तोटा झाला, तर यापूर्वीचा १४०० कोटींचा संचित तोटा आहेच. यातच एसटी कर्मचाऱ्यांना वेतनवाढ दिल्याने वर्षाला ६०० कोटींचा बोजा वाढणार आहे. अशा स्थितीत एसटी महामंडळ चालविणे मुश्कील बनले. संप ताणल्याची संधी साधून एसटीच्या चार सेवांचे खासगीकरण(Privatization) झाले. यापूर्वी आणखी सात सेवांचे खासगीकरण झाले. संप वाढत जाताना एसटीचे बस खासगीकरण सुसाट आहे.

संप ७४ दिवस सुरूच आहे, संपकाळात एसटी प्रशासनाने अभूतपूर्व वेतनवाढ दिली. परिवहनमंत्री ॲड. अनिल परब यांनी कर्मचाऱ्यांनी कामावर हजर व्हावे, बडतर्फीची केलेली कारवाई मागे घेतो, असेही सांगितले, तरीही कर्मचारी मागणी व संपावर ठाम आहेत. यात प्रत्येक दिवशी लाखो प्रवाशांचे हाल होत आहेत. एसटीचा रोजचा १२ ते १५ कोटींचा महसूल बुडतो.भविष्यात एसटी महामंडळाला कर्मचाऱ्यांचे वेतन देण्यासाठी पुरेसा महसूल मिळेल, की नाही, अशी शंका आहे. याचवेळी एसटीने पर्याय शोध सुरू केला, यात खासगी कंपन्यांकडून चालक नियुक्ती करणे, संपकाळात तीन हजारांवर खासगी वाहतूकदारांना खासगी वाहनातून एसटी बस स्थानकातून प्रवासी वाहतूक करण्यास परवानगी दिली.

खासगी कंपन्यांचे(Private company drivers) चालक शिवशाही बस(shivshahi bus) चालविण्यासाठी घेतले. सेवानिवृत्तचालकांना पुन्हा चालक म्हणून सेवेत घेतले. राज्यभरात ५०० हून अधिक चालक भरले जाणार आहेत. आठ-दहा दिवसांत प्रक्रिया पूर्ण झाल्यास एसटीची मूळ सेवा असलेल्या प्रवासी वाहतुकीत २५ ते ३५ टक्के कर्मचारी खासगी सेवेचे असतील.