कोल्हापूर : जिल्ह्यात पावसाने दडी मारली आहे, दोन किंवा तीन दिवसांतून एकदाच जोरदार पाऊस होतो. गेल्यावर्षी (2019) जिल्ह्यात जुलैमधील 14 दिवसांत 341 मिलिमीटर पाऊस झाला होता. यावर्षी सरासरी चौदा दिवसांत 147 मिलिमीटर पावसाची नोंद झाली आहे. राधानगरी धरणातही सुमारे 1 टीएमसी पाणीसाठा कमी आहे. गेल्या वर्षीच्या पुराचा अनुभव पाहता जलसंपदा विभागाने योग्य नियोजन केले आहे. 

गेल्यावर्षी अतिवृष्टीने जिल्ह्याला झोडपून काढले. एक दिवसही पावसाने उसंत घेतली नव्हती. त्यामुळेच गेल्यावर्षी उच्चांकी नोंद झाली. याउलट यावर्षी परिस्थिती आहे. 1 जुलैपासून जिल्ह्यात सरासरी 147 मिलिमीटर पावसाची नोंद झाली आहे, तर गेल्यावर्षी जुलैमध्ये 341 मिलिमीटर पाऊस झाला. गेल्यावर्षीच्या तुलनेत 194 मिलिमीटर पाऊस कमी झाला आहे. 

जिल्ह्यातील राधानगरी धरणात गेल्यावर्षीच्या तुलनेत 1 टीएमसीने पाणीसाठा कमी आहे. राधानगरी, गगनबावडा, शाहूवाडीसह इतर तालुक्‍यांतही पावसाचे प्रमाण कमी आहे. त्यामुळे उसाला पोषक ठरणारा हा पाऊस असला तरीही भात, भुईमूग, सोयाबीनसाठी आणखी जोरदार पावसाची गरज आहे. राधानगरी धरणाची पाणी पातळी व्यवस्थित ठेवण्यासाठी प्रयत्न केले जात आहेत. 

14 जुलै 2019 व 14 जुलै 2020 चा तुलनात्मक धरणातील साठा (टीएमसीमध्ये) 

धरण----2019----2020 
-------------------------- 
राधानगरी----5.50----4.82 
तुळशी----1.92----1.74 
वारणा----18.44----18.47 
दूधगंगा----9.63----15.20 

गेल्यावर्षी अतिवृष्टी झाली. जुलैअखेरनंतर ते ऑगस्टमध्ये जोरदार पाऊस झाला. यावर्षी आत्तापर्यंत पावसाचे प्रमाण कमी आहे. गेल्यावर्षीचा अनुभव पाहता, यावर्षी सर्वच धरणातील आवश्‍यक पातळीवर आणला आहे. राधानगरी धरणातील पाणीसाठाही गेल्यावर्षीच्या तुलनेत सुमारे एक टीएमसीने कमी ठेवला आहे. 
- रोहित बांदिवडेकर, कार्यकारी अभियंता, जलसंपदा. 

दृष्टिक्षेप 
- दोन-तीन दिवसांतून पडतो एकदाच मोठा पाऊस 
- गतवर्षी 14 जुलैपर्यंत 341 मिलिमीटर पाऊस 
- यावर्षी 14 जुलैपर्यंत 147 मिलिमीटर पाऊस 
- गेल्यावर्षीच्या तुलनेत 194 मिलिमीटर कमी पाऊस 
- राधानगरी, गगनबावडा तालुक्‍यातही पावसाचे प्रमाण कमीच 

संपादन : प्रफुल्ल सुतार