कोल्हापूर : गेल्या दीड वर्षाहून अधिककाळ अरुण लाड व श्रीमंत कोकाटे हे पदवीधरांच्या गाठीभेटी, मतदार फॉर्म भरून घेण्यासाठी शर्थीचे प्रयत्नात आहेत. दोन्ही इच्छुक पुणे पदवीधर मतदार संघातून निवडणूक लढवण्यासाठी राष्ट्रवादीकडून शर्यतीत आहेत. मात्र राष्ट्रवादीचा उमेदवार कोण असणार यावर भाजपची रणणीती ठरणार आहे. त्यामुळे या दोन्ही प्रबळ दावेदांरापैकी नंबर कोणाचा लागणार हे येणारा काळच ठरवणार आहे. 

हेही वाचा - 'चंद्रकांतदादांना हिमालयामध्ये जावे लागणार नाही' -

२०१४ च्या निवडणुकीत पुणे मतदार संघात आघाडीत झालेल्या बंडखोरीमुळे महायुतीचे उमेदवार चंद्रकांत पाटील यांना निसटता विजय मिळाला होता. चुरशीच्या या निवडणूकीत चंद्रकांत पाटील २ हजार ३८० मतांच्या फरकाने विजयी झाले होते. गेल्या निवडणुकीत राष्ट्रवादीकडून सारंग पाटील आणि अरुण लाड दोघांनीही आपला दावा सांगितला होता. यामध्ये सारंग पाटील यांना संधी मिळाली. त्यामुळे अरुण लाड यांनी बंडखोरी केली होती.

हेही वाचा - शिवसेनेचे दिग्गज भाजपच्या वाटेवर -

मात्र दोघांमध्ये आघाडीची मते विभागली गेली आणि दोघांनाही पराभव पत्कारावा लागला. अरुण लाड यांनी आपली उमेदवारी मागे घ्यावी, यासाठी राष्ट्रवादीच्या सर्वच नेत्यांनी प्रयत्न केले. पण त्यांना यश आले नव्हते. शेवटी अरुण लाडही मैदानात उतरले होते. आगामी येऊ घातलेल्या निवडणुकीत अरुण लाड सुरुवातीपासून राष्ट्रवादीचे उमेदवार म्हणूनच पदवीधरांशी संर्पक साधत आहेत. विविध माध्यमातून त्यांच्या भेटीही घेत आहेत. तर, श्रीमंत कोकाटे हे पदवीधरांसाठी विविध योजना व विषय घेवून निवडणूक रिंगणात उतरले आहेत. त्यांनीही राष्ट्रवादीकडूनच निवडणूक लढविणार असल्याचे सांगितले आहे. 

संपादन - स्नेहल कदम