कोल्हापूर : खासगी सावकारी विरोधात सर्वसामान्य कुटुंबीयांना न्याय मिळवून देताना राजकीय बदनामीपोटी आखण्यात आलेल्या षड्‌यंत्र विरोधी पक्ष पाठीशी घालत असल्याचे आज पुन्हा सिद्ध झाले. राजकीय बदनामी करण्यासाठी एका विरोधी पक्षनेत्याला खासगी सावकाराच्या बाजूने उभे राहून पोलिस प्रशासनाला धारेवर धरावे लागते. म्हणजेच विरोधी पक्षनेते कॉंग्रेसप्रणीत खासगी सावकारीला पाठबळ देत आहेत, असे पत्रक राज्य नियोजन मंडळाचे कार्याध्यक्ष राजेश क्षीरसागर (Rajesh Kshirsagar) यांनी प्रसिद्धीस दिले.

पत्रकात म्हटले आहे, दानवे यांनी कोल्हापुरात येवून एखाद्या लोकप्रतिनिधीचा एकेरी भाषेत उल्लेख केला. यावरून त्यांच्या संस्काराचे दर्शन होते. दानवे हे जनतेतून निवडून न येता मागच्या दरवाजाने आमदार होवून विरोधी पक्षनेते बनले आहेत. त्यामुळे त्यांना जनतेच्या प्रश्नाची जाण नाही. राजकीय हेतूने अंबादास दानवे (Ambadas Danve) यांनी केलेल्या स्टंटबाजीस छत्रपती संभाजीनगर मध्ये (Chhatrapati Sambhajinagar) येवून उत्तर देवू.’

दरम्यान, घटनास्थळी असलेले ऋतुराज क्षीरसागर म्हणाले, ‘विरोधी पक्षनेता फार मोठे पद आहे. हिंदूहृदय सम्राट बाळासाहेब ठाकरे यांनी दिलेल्या संस्काराचा अपमान होऊ नये म्हणून आम्ही त्यांना विरोध केला नाही. त्या कुटुंबीयांची भेट घेवून सांत्वन होत असल्यास आम्हाला आनंद आहे. पोलिस प्रशासन त्यांच्याप्रमाणे कारवाई करीत आहे. आम्ही दोषी असल्यास कारवाई होईल.’