कोल्हापूर : करवीरनिवासिनी अंबाबाई मंदिरातील माजी सैनिक सुरक्षारक्षकांबाबतची अंतिम सुनावणी गुरुवारी झाली. सुनावणीत पश्चिम महाराष्ट्र देवस्थान समितीच्या वतीने सचिव शिवराज नाईकवडे यांनी विविध कागदपत्रे सादर केली. निवडणूक अधिकारी भगवान कांबळे यांच्यापुढे ही सुनावणी झाली. लवकरच याबाबतचा अहवाल जिल्हाधिकारी राहुल रेखावार यांना दिला जाणार आहे.

अंबाबाई मंदिरातील सुरक्षेसाठी २००६ ला सुरक्षारक्षक नेमले होते. त्यांनी कामगार कायद्याप्रमाणे वेतन मिळावा, कायम करावे व इतक्या वर्षांच्या फरकाची रक्कम द्यावी, अशी मागणी करून न्यायालयात दावा दाखल केला होता. त्याचा निकाल लागूनही देवस्थान समितीकडून मागण्यांची पूर्तता होत नसल्याने त्यांनी जिल्हाधिकाऱ्यांकडे धाव घेतली. त्यानुसार ही सुनावणी आज पूर्ण झाली.

दरम्यान, देवस्थान समितीच्या कारभाराबाबत विविध संस्था, संघटनांनी निवेदने दिली आहेत. अशा विविध संघटनांच्या प्रतिनिधींशी जिल्हाधिकाऱ्यांनी बैठक घेतली. त्यांच्या तक्रारींचा आढावा या वेळी घेण्यात आला.