कोल्हापूर : कोरोना संसर्ग रोखण्यासाठी आज वर्षाला निरोप आणि नवीन वर्षाचे स्वागत करण्यासाठी पंचगंगा घाट, रंकाळा, इतर तलाव, उद्यान, नदीघाटावर गर्दी करु नये. नवीन वर्षाचे स्वागत घरीच आणि साधेपणाने करावे, असे आवाहन जिल्हाधिकारी दौलत देसाई यांनी आज केले आहे. 

देसाई म्हणाले, 31 डिसेंबर ला नागरिकांनी तलाव, उद्याने, नदीघाट अशा सार्वजनिक ठिकाणी गर्दी करतात. तसेच, याठिकाणी फिरताना सोशल डिस्टन्सींग (सामाजिक अंतर) राहील तसेच मास्क व सॅनिटायझरचा वापर होईल याकडे विशेष लक्ष दिले पाहिजे. रंकाळा तलाव, कळंबा तलाव, नदी घाट परिसर, उद्याना ठिकाणी गर्दी करु नये. कोरोनाच्या पार्श्वभूमीवर 60 वर्षावरील नागरिकांनी व दहा वर्षाखालील मुलांनी सुरक्षिततेच्या व आरोग्याच्या दृष्टीने शक्‍यतो घराबाहेर जाणे टाळावे.

हेही वाचा - सावकारांचा जुगार अड्ड्यांवर डोळा ; तासांच्या बोलीवर होतोय कर्जपुरवठा -

नववर्षाच्या स्वागताच्या निमित्ताने कोणत्याही प्रकारे धार्मिक, सांस्कृतिक कार्यक्रमाचे आयोजन करु नये. मिरवणुका काढण्यास मनाई आहे. नूतन वर्षाच्या पहिल्या दिवशी बहुसंख्य नागरिक धार्मिक स्थळी जात असतात, अशावेळी त्या ठिकाणी एकाच वेळी गर्दी न करता सोशल डिस्टन्सींगचे पालन करावे. संबंधितांनी आरोग्य व स्वच्छतेच्या दृष्टीकोनातून योग्य त्या खबरदारीच्या उपाययोजना केल्या पाहिजेत. 

ध्वनीप्रदूषणाच्या अनुषंगाने नियमांचे काटेकोरपणे पालन करावे. फटाक्‍यांची आतिषबाजी करण्यात मनाई आहे. कोरोना विषाणूंचा प्रादूर्भाव रोखण्यासाठी शासनाच्या मदत व पुनर्वसन, आरोग्य, पर्यावरण, वैद्यकीय शिक्षण विभाग तसेच संबंधित महानगरपालिका, पोलीस, स्थानिक प्रशासन यांनी दिलेल्या नियमांचे काटेकोर पालन करावे. असे आवाहनही देसाई यांनी केले आहे. 

हेही वाचा - गायत्री पुढे जाताच मागून किंकाळ्या ऐकू आल्या, फिरुन पाहिले तर मैत्रिण झेलत होती तलवारीचे वार -

31 डिसेंबरसाठी जिल्हा प्रशासनाच्या सूचना : 

• रंकाळा, पंचगंगा घाट, उद्यान, सार्वजनिक ठिकाणी गर्दी करु नये 
• फटाके फोडू नये 
• ज्येष्ठ नागरिग, लहान मुलांनी घरीच रहावे 
• सुरक्षित अंतर राखावे 
• मास्क वापरावा 
• ध्वनीप्रदुषणा होणार नाही याची काळजी घ्यावी 

संपादन - स्नेहल कदम