उत्तूर (कोल्हापूर): येथील माजी उपसरपंच संजय उत्तूरकर यांच्या ओंकार पोल्ट्री फार्ममध्ये अतिवृष्टीने जवळील ओढ्याचे पाणी घुसल्याने तीन हजार कोंबडीची पिल्ली दगावली. उत्तूरकर यांचे दोन लाख रुपयाचे नुकसान झाले.

उत्तूर -चव्हाणवाडी रस्त्याला तुरुक नाल्याजवळ उत्तूरकर यांचे शेत आहे. याठिकाणी त्यांनी पोल्ट्री फार्म उभा केला. याठिकाणी पहिल्यांदा सात दिवस वयाची ३ हजार पिल्ली ठेवण्यात आली. काल पासून यापरिसरात अतिवृष्टी सुरु आहे. यामुळे नाल्याचे पाणी पोल्ट्रीत घुसले व याठिकाणी ठेवलेली पिल्ली पाण्यात बुडून मृत्यू पावली. खाद्य औषध व पिल्लांचे मिळून दोन लाखाचे नुकसान झाले.

संजय उत्तूरकर हे आजरा साखर कारखान्याकडे कर्मचारी आहेत. कारखाना बंद असल्याने व पगार थकल्याने उदरनिर्वाहासाठी त्यांनी कर्ज काढून व उधार उसणवारी करुन पोल्ट्री उभा केली. मात्र पावसामुळे त्यांचे मोठे नुकसान झाले.