जोतिबा डोंगर (कोल्हापूर): दख्खनचा राजा श्री जोतिबा देवाची चैत्र यात्रा यंदा पूर्ण क्षमतेने होणार असल्याची अधिकृत घोषणा पालकमंत्री सतेज पाटील (Satej Patil) यांनी जोतिबा डोंगरावर (Jyotiba Tempal) आढावा बैठकीत केली. यात्रा यशस्वीपणे पार पडण्यासाठी सर्व शासकीय विभागाचे प्रमुख, भाविक, ग्रामस्थ व पुजारी यांनी प्रशासनास सहकार्य करावे असे आवाहनही पालकमंत्र्यांनी केले. या यात्रेत भाविकांना कोणतेही निर्बंध नसणार आहेत. त्यामुळे यंदा या यात्रेत उच्चांकी गर्दी होण्याचा प्रशासनाने अंदाज व्यक्त केला आहे.

कोरोना संसर्गामुळे सलग दोन वर्षे चैत्र यात्रा झाली नाही. यंदा यात्रा काळात सलग सुट्टीचे दिवस असल्यामुळे मोठी गर्दी वाढेल असा प्रशासनाचा अंदाज आहे. त्यानुसार तयारीचे सर्व नियोजन सुरु होणार आहे. दरम्यान, आढावा बैठकीमध्ये सर्व शासकीय विभागांचा आढावा घेण्यात आला. ज्यांनी दोन डोस घेतले आहेत. त्यांनाच डोंगरावर विविध कामांसाठी परवानगी द्या अशा सूचना पालकमंत्र्यांनी दिल्या.

नव्याने बांधण्यात आलेल्या दर्शन मंडपातील पहिल्या व दुसऱ्या मजल्यावरून दर्शन रांग लावण्याचा प्रशासनाचा विचार आहे. या दर्शन मंडपात जाऊन पालकमंत्र्यांनी पाहणी करून यंत्रणेस सूचना दिल्या. कोणत्याही भाविकाला इजा होता कामा नये त्यानुसार या दर्शनमंडपात रांगेत बॅरिकेड्स लावून काळजीपूर्वक नियोजन करा अशा सूचना त्यांनी देवस्थान समितीच्या प्रशासनास दिल्या.

बैठकीमध्ये डोंगरावर जी खाद्य पदार्थांची विक्री होते, ज्यांचा परवाना आहे त्यांनाच परवानगी देण्यात येणार आहे. मंदिर परिसरात दर्शन रांगेचे नियोजन ,बैठकीत येण्या-जाण्याचे मार्ग, पार्कींग, बंदोबस्त अरोग्य पाणीपुरवठा या विषयांवर सविस्तर चर्चा झाली. मंदिर परिसरात अनावश्यक रेलिंग काढल्यामुळे मंदिर परिसर मोकळा झाला आहे या कामाबद्दल बैठकीत समाधान व्यक्त करण्यात आले.