वडणगे (कोल्हापूर) : यंदा उसाचे बंपर उत्पादन आहे. त्या प्रमाणात साखर कारखान्याकडे ऊस तोडीची यंत्रणा नाही,जी आहे ती, बड्या शेतकऱ्यांचा ऊसतोडीसाठी दिली जाते. ऊस लागणीच्या नोंदणीनुसार झालेल्या पाळीपत्रकाचा बोजवारा उडला आहे. त्यामुळे अल्पभूधारक सभासद शेतकरी ऊसतोडीसाठी कारखान्याच्या कार्यालयात रोज हेलमाटे मारत आहे.

आज उदया असे शेतकऱ्यांना सांगून कारखाना प्रशासन टोलवाटोलवी करत आहे.ऊसतोडीसाठी कारखान्याच्या गट कार्यालयात सभासद शेतकऱ्यांसह, बिगर सभासदांची रोज गर्दी असते.'साहेब, तोडणीचा तारीख होवून गेली, कधी ऊस तोड देता, अशी विचारणा शेतकरी चिटबॉय व सर्कल इनचार्जकडे करत आहेत. यंत्रणा कमी आहे. आज- उद्या देता असे शेतकऱ्यांना सांगून ते वेळ मारून नेतात. एकीकडे असे चित्र असले तरी दुसरीकडे कारखान्याच्या हायकमांडशी असलेल्या संबंधामुळे बडया शेतकऱ्यांनी वजन वापरून आपलाच ऊसतोडणीसाठी यंत्रणा लावल्याचे दिसते. अल्पभूधारक शेतकरी मात्र आज तोड येईल उद्या येईल या आशेवर आहे. 

हे पण वाचा - Video - काँग्रेस पक्ष रसातळाला का गेला? राजू शेट्टी यांनी सांगितले कारण

 मोठे शेतकरी पैसे देवून ऊस तोडून घेतात. लहान शेतकऱ्यांना स्वत: ऊस तोडा व कारखान्याला पाठवा, असे सांगितले जाते शेतकऱ्यांनी ऊस लावायचा व तो तोडून कारखान्यांना पाठवायचा हा कुठला न्याय 
-रमेश कुंभार , शेतकरी. 

कारखान्यांकडून बडया शेतकऱ्यांना लगेच ऊसतोड दिली जाते. सभासद शेतकऱ्यांच्या नावावर अनेक बिगर सभासद ऊस पाठवतात. पाळीपत्रकात घोळ करून कमी क्षेत्र असलेल्या काही सभासद शेतकऱ्यांच्या नावावर जादा ऊस कसा काय ?   
- राहूल जाधव, शेतकरी. 

संपादन - धनाजी सुर्वे