इचलकरंजी : सुळकूड पाणी योजनेवरून (Sulkud Water Scheme) चिथावणीखोर वक्तव्य करून सामाजिक वातावरण बिघडवण्याचे काम राजकीय मंडळी करत आहेत. राजकीय फायद्यासाठी असे वक्तव्य करणाऱ्या वैद्यकीय मंत्री हसन मुश्रीफ व माजी आमदार के. पी. पाटील यांच्या विरोधात कायदेशीर कारवाई करावी, अशी मागणी करण्यात आली.

याबाबतचे निवेदन ‘मी इचलकरंजीकर (Ichalkaranji), एक चळवळ पाण्यासाठी’ या चळवळीकडून अपर पोलिस अधीक्षक निकेश खाटमोडे-पाटील यांना देण्यात आले. इचलकरंजीसाठी स्वच्छ व मुबलक पाणी मिळावे, यासाठी शासनाने दूधगंगा सुळकूड पाणीपुरवठा योजना राबविण्यात येत आहे. मात्र, सामान्य लोकांत दंगल घडवून हाणामारी व्हावी, याचा राजकीय फायदा मिळावा म्हणून राजकीय नेते चिथावणीखोर भाषणे करत आहेत.

यात मंत्री हसन मुश्रीफ (Hasan Mushrif) यांनी रक्तपात होईल, तर माजी आमदार के. पी. पाटील यांनी कर्नाटकमधील नागरिकांना तलवारी घेऊन येण्याचे आवाहन केले. यांना राजकीय मते मिळवण्यासाठी दंगल घडवून सामाजिक वातावरण बिघडवायचे आहे का, असा प्रश्न उपस्थित होत आहे.

याची दखल घेऊन या दोन्ही नेत्यांवर योग्य ती कायदेशीर कारवाई करावी, भविष्यात पाणी योजनेवरून दंगल घडल्यास या दोन्ही नेत्यांना जबाबदार धरावे, अशी मागणी केली. अमित कुंभार, उमाकांत दाभोळे, विशाल माळी, मुकुंद तारळेकर, अमोल भोसले, प्रमोद पाटील, सुनील जाधव, रविकिरण हुक्कीरकर उपस्थित होते.