जयसिंगपूर : कोथळी (ता. शिरोळ) येथे दोन ठिकाणी जबरी चोरीच्या घटनांनी भितीचे वातावरण निर्माण झाले आहे. अनिल कुमगोंडा पाटील व मौला खुदबूदिन मुजावर यांच्या घरात मंगळवारी पहाटे तीन चोरट्यांनी जबरी चोरी केली. यात बबिता पाटील या महिलेच्या गळ्यातील मंगळसुत्र हिसडा मारून नेला. तर मौला मुजावर यांचे घर फोडून तीन हजार रूपयाची रोकड अशी एकुण सतरा हजाराचा मुद्देमाल चोरट्यांनी लंपास केला. याबाबतची नोंद जयसिंगपूर पोलिसात झाली आहे.

पोलिसातून मिळालेली अधिक माहिती अशी, कोथळी येथील दानोळी मार्गावर प्रथम सागर पाटील यांचे राहत्या घरात तीन चोरट्यांनी दरवाजा ढकलून प्रवेश केला. आई बबिता पाटील यांच्या गळ्यातील दहा हजार रूपये किंमतीचे सोन्याचे मंगळसुत्र हिसडा मारून नेले. त्याचबरोबर संदेश व श्रीवर्धन पाटील यांची शैक्षणिक कागदपत्रे ही चोरट्यांनी लंपास केली आहेत. त्यानंतर चोरट्यांनी हरिपूर रोडवरील मौला मुजावर यांच्या घराची कडीकोयंडा कापून काढून घरातील प्लॉस्टिक भिशीतील तीन हजाराचा मुद्देमाल लंपास केला.

घटनास्थळी अपर पोलिस अधिक्षक जयश्री गायकवाड, डिवायएसपी रामेश्वर वैंजणे, पो.नि.राजेंद्र मस्के यांनी पाहणी केली. त्याचबरोबर श्वान व ठस्से तज्ञांना पाचारण करण्यात आले. दरम्यान तीन चोरटे गावातील एका सीसीटीव्हीत कैद झाले आहेत. त्यामुळे जयसिंगपूर पोलिसांनी तपासासाठी पथके तैनात केली आहेत. दानोळी येथेही काही शेतकऱ्यांच्या कृषी पंपाच्या केबल चोरीला गेल्या. यामुळे शेतकऱ्यांमध्ये भितीचे वातावरण निर्माण झाले आहे.