कोल्हापूर : मोदी सरकारने उद्योजकांच्या फायद्यासाठी केलेले तीन कृषी विधेयक रद्द करावे, यासाठी स्वाभिमानी शेतकरी संघटनेकडून उद्या (गुरुवार) सायंकाळी 7 ते शुक्रवारी (ता. 4) सकाळी 7 पर्यंत रात्रभर भजन, किर्तण करत आत्मक्‍लेश करत जिल्हाधिकारी कार्यालयासमोर जागर आंदोलन करण्याचा निर्णय घेतला असल्याची माहिती स्वाभिमानी शेतकरी संघटनेचे संस्थापक व माजी खासदार राजू शेट्टी यांनी सांगितले. शेतकरी तर येतीलच पण ज्यांना शेतकऱ्यांचे प्रश्‍न सुटले पाहिजेत असे वाटते त्यांनीही या मुर्दाड सरकारला जागं करण्यासाठीच या आंदोलनात सहभाग घेण्याचे आवाहन श्री शेट्टी यांनी केले आहे. 

श्री शेट्टी म्हणाले, दिल्लीत गेल्या सात दिवसपासून लाखो शेतकरी कुडकूडत बसले आहेत. त्यांच्यावर पाण्याचे फवारे मारले. लाठीमार केला. तरीही ते शेतकरी जागचे हलले नाहीत. त्यांची केवळ एकच मागणी आहे, की सरकारने उद्योगपतींच्या हितासाठी तीन कृषी विधेयक केले आहे. ते तात्काळ रद्द करावेत. शेतकऱ्यांना अदाणी आणि अंबानींचे गुलाम करु नका. शेतकऱ्यांनी पिकवलेल्या कृषी मालाला हमी भाव मिळाला पाहिजे किंवा त्याचा दर ठरवण्याची मुभा शेतकऱ्यांच द्या, अशी मागणी केली जात आहे. मात्र, हे आंदोलन शिखांचे आहे. खलिस्तानवाद्यांचे आहे. असे म्हणून शेतकऱ्यांना हिनवले आहे. या आंदोलनाला प्रांतीय आणि राजकीय रंग दिला आहे. पण सरकारने शेतकऱ्यांच्या हक्कावर गदा आणू नये. त्यांना त्यांच्या हक्काची शेती करु द्यावी, अशी मागणी श्री शेट्टी यांनी केली. कायद्याने बंधनकारक असणारा हमी भाव मिळावा. पण सरकार याकडे दुर्लक्ष करत आहे. प्रत्येकाला या आंदोलनात जावे असे वाटते. आपण जावू शकत नाही. म्हणून स्वाभिमानी शेतकरी आत्मक्‍लेश आंदोलन केले जाईल. राज्यातील प्रत्येक जिल्हाधिकारी कार्यालयासमोर हे आंदोलन केले जाईल. संध्याकाळचे जेवण घेवूनच शेतकरी हे आंदोलन करतील. रात्रभर भजन, किर्तन करत आत्मक्‍लेश केला जाईल, असेही शेट्टी यांनी सांगितले. 

हे पण वाचा - अनैतिक संबंधातून कोयत्याने केला हल्ला अन् कोंडले घरात

संपादन - धनाजी सुर्वे