कोल्हापूर : घरगुती गॅस सिलिंडरच्या (Gas Cylinder Blast) गळतीने आज सकाळी झालेल्या स्फोटात दोघे जखमी झाले. राजारामपुरी (Rajarampuri) दुसरी गल्ली टाकाळा (Takala) परिसरात ही घटना घडली. घटनेत मोईनुद्दीन जमादार (वय ७०) आणि रियाज जमादार (५५) अशी जखमींची नावे आहे. त्यांना सीपीआर मध्ये दाखल केले आहे. घटनेत कच्च्या घराच्या दोन्ही भिंती आणि छप्पर उडाल्याने परिसरात घबराट पसरली. अग्नीशमन दलाच्या जवानांनी घटनास्थळी धाव घेवून जखमींना सीपीआर मध्ये दाखल केले. घटनेत सुमारे दीड लाख रुपयांचे नुकसान झाल्याचे अग्नीशमन दलाकडून सांगण्यात आले.

ताराराणी विद्यापीठाच्या पूर्व बाजूस असलेल्या टाकाळा परिसरात राजारामपुरी दुसऱ्या गल्ली परिसरात आज साडेनऊच्या सुमारास ही घटना घडली. अग्नीशमन दलाला ही माहिती मिळताच ते तातडीने घटनास्थळी पोचले. तेंव्हा घराचे छप्पर, दोन भिंती पडल्याचे आढळून आले. तसेच घरी असलेल्या मोईनुद्दीन आणि रियाज हे दोघे जखमी झाले. त्यांच्या अंगावर छप्परचा आणि भिंतींचा काही भाग पडल्यामुळे ते जखमी झाले होते.

घरगुती गॅस सिलिंडरचा स्फोट झाल्यामुळे झालेल्या घटनेने परिसरात भितीचे वातावरण निर्माण झाले. परिसरातील नागरिकांनी तेथे मदतीसाठी प्रयत्न केले. याच दरम्यान तेथे पोचलेल्या प्रभारी अधिकारी जयवंत खोत, जवान वामन चौरे, मधुकर जाधव, केरबा निकम, अवधूत चव्हाण, चालक उमेश जगताप यांनी जखमींना बाहेर काढून सीपीआर मध्ये दाखल केले. या घटनेत साधरण दीड लाख रुपयांचे नुकसान झाले असून याचा पंचनामा ही अग्नीशमन जवानांनी केला आहे. घर कच्च्या बांधकामाचे असल्यामुळे छप्पर पूर्णपणे उडून गेले असून प्रापंचिक साहित्याही अस्ताव्यस्थ फेकले गेले. गॅस गळती नेमकी कशामुळे झाली आहे, याचाही तपास सुरू झाला आहे.