बेळगाव - दुरूस्ती काम हाती घेतल्यानंतर तब्बल दोन आठवड्यांनी येथील किल्ला तलावाजवळील राष्ट्रध्वज अखेर फडकला. देशातील सर्वात उंच असा नावलौकीक असलेल्या या ध्वजाच्या स्तंभाची दुरूस्ती 10 जून रोजी सुरू करण्यात आली होती. आठवडाभरातच दुरूस्तीचे काम पूर्ण झाले, पण ध्वज फडकविण्यात पाऊस व वाऱ्याचा अडथळा येत होता. त्यामुळे प्रात्यक्षीक घेण्यात आले नव्हते. गेल्या चार दिवसांपासून पावसाचे प्रमाण कमी झाले आहे. वाऱ्याचा जोरही कमी झाला आहे. त्यामुळे बुधवारी (ता.24) प्रात्यक्षीक घेण्याचा निर्णय झाला. ध्वजस्तंभ दुरूस्तीसाठी आलेले तंत्रज्ञ व महापालिकेचे अधिकारी आणि कर्मचारी यांच्या उपस्थितीत प्रात्यक्षीक घेण्यात आले. स्वयंचलीत यंत्राद्वारे ध्वज स्तंभावर चढविण्यात आला, सहा मनिटानंतर ध्वज फडकला. प्रात्यक्षीक झाल्यानंतर ध्वज पुन्हा उतरविण्यात येणार होता पण पाऊस व वारा नसल्यामुळे बुधवारी दिवसभर तो न उतरविण्याचा निर्णय घेण्यात आला. बुधवारी दिवसभर ध्वज डौलाने फडकत होता.

वाचा - तो कोरोना पॉजिटीव्ह कोल्हापुरच्या सी.पी.आर रुग्णालयातून पळाला अन् रिक्षाने थेट..

बेळगावातील हा ध्वज बजाज इलेक्‍ट्रीकल्स या कंपनीने उभारला आहे. दोषदायीत्व कालावधी अद्याप पूर्ण न झाल्याने ध्वज व स्तंभाची दुरूस्ती करण्याची जबाबदारी कंपनीवरच आहे. 26 जानेवारी 2020 रोजी प्रजासत्ताकदिनी हा ध्वज फडकविण्यात येणार होता. पण ध्वजस्तंभावरील व्हील नादुरूस्त झाल्यामुळे ध्वज फडकविता आला नाही. त्यामुळे महापालिकेने बजाज कंपनीशी संपर्क साधून दुरूस्ती करण्याची सूचना दिली. फेब्रुवारी किंवा मार्च महिन्यात दुरूस्ती काम होणे आवश्‍यक होते, पण झाले नाही. 22 मार्चपासून लॉकडाऊन लागू झाले, त्यामुळे पुन्हा दुरूस्ती काम रखडले. लॉक डाऊन शिथिल झाल्यावर जून महिन्याच्या दुसऱ्या आठवड्यात बजाज कंपनीच्या सहा तज्ञांचे पथक बेळगावात दाखल झाले. त्यानी 10 जून रोजी दुरूस्ती काम हाती घेतले. त्याचवेळी बेळगावात पावसाला सुरूवात झाली, त्यामुळे दुरूस्तीलाही विलंब लागला. आठवडाभरानंतर नेमकी समस्या समजली.

वाचा - कैद्यांची वाचनाची भूक भागविण्यासाठी अशीही धडपड...

ध्वजस्तंभावरील व्हील नादुरूस्त झाल्याचे निदर्शनास आले. त्यामुळे ते व्हील काढून नवे बसविण्यात आले. गेल्या आठवड्यात हे काम पूर्ण झाले, पण प्रात्यक्षीक घेता आले नव्हते. बुधवारी वातावरणाचा अंदाज घेवून सकाळी आठ वाजता ध्वज फडकविण्यात आला. बेळगावातील हा ध्वज मार्च 2018 मध्ये सर्वप्रथम फडकविण्यात आला. तो ध्वज नियमितपणे फडकत रहावा अशीच बेळगावरांची अपेक्षा होती. पण जोरदार पाऊस व सोसाट्याचा वारा यामुळे ध्वजाचे वारंवार नुकसान होवू लागले. त्यावर उपाय म्हणून ध्वजाचा आकार कमी करण्यात आला, तरीही ही समस्या सुटली नाही. ध्वज वर्षातून तीनवेळा फडकविण्याचा निर्णय महापालिका प्रशासनाने घेतला आहे. त्यामुळे आता 15 ऑगस्ट रोजी म्हणजे स्वातंत्र्यदिनी तो फडकविला जाईल.