शाहूनगर : भोगावती सहकारी साखर कारखान्याची (Bhogavati Sugar Factory) आगामी निवडणूक शिवसेना (उद्धव बाळासाहेब ठाकरे गट) स्वबळावर लढवणार असल्याची माहिती ओमसाई उद्योग समूहाचे संस्थापक व शिवसेना नेते चंद्रकांत पाटील-कौलवकर यांनी परिते येथे पत्रकार परिषदेत दिली.

यावेळी पाटील म्हणाले, ‘भोगावती कारखान्याची सध्याची आर्थिक परिस्थिती अत्यंत बिकट आहे. त्यामुळे शेतकऱ्यांच्या श्रमाचे हे मंदिर वाचवण्याची भूमिका घेऊन आम्ही या निवडणुकीत उतरत आहोत. कारखान्याच्या हितासाठी निवडणूक बिनविरोध करण्याचे प्रयत्न सुरू आहेत. यामध्ये आम्हाला योग्य प्रतिनिधीत्व मिळाल्यास बिनविरोध निवडीला आमचे समर्थन राहील.

मात्र, निवडणूक लागल्यास आम्ही ताकदीने या निवडणुकीत उतरणार आहोत. आजपर्यंत कारखाना वाचवू म्हणणाऱ्या सर्वांनीच गेल्या वीस वर्षांत कारखान्याच्या हिताकडे लक्ष दिलेले नाही. या निवडणुकीत सर्वसामान्य सभासद आमच्याबरोबर असल्याने आम्ही ही निवडणूक निश्चित जिंकू.’ पत्रकार परिषदेस शिवसेना करवीर तालुकाप्रमुख भरत आमते, डॉ. व्ही. बी. सरावणे, सागर पाटील, अविनाश परीट, सखाराम पाटील, संपत फराकटे आदी उपस्थित होते.