कोल्हापूर : पूरग्रस्तांच्या मागणीसाठी आंदोलन सुरू असताना पंचगंगा घाटामध्ये एकाने उडी मारली. यामुळे गोंधळाचे वातावरण निर्माण झाले. तातडीने अग्निशमन दलाच्या जवानांनी व पोलिसांनी त्याला बाहेर काढले. आणि त्याला अटक करण्यात आली.

महापुरात पाण्याखाली गेलेल्या शिये गावचे पुनर्वसन व इतर गावातील पूरग्रस्तांचे पुनर्वसन करावे या मागणीसाठी रघुनाथदादा पाटील प्रणित शेतकरी संघटनेतर्फे अॅड माणिक बाबुराव शिंदे यांच्या मार्गदर्शनाखाली आंदोलन सुरू होते. त्यावेळी हा प्रकार घडला.

करवीर तालुक्तील शिये या गावातील जिल्ह्यातील नदीकाठच्या लोकांचे 1989, 2005, 2019 आणि 2021 मध्ये आलेल्या महापुरामुळे मोठया प्रमाणात आर्थिक नुकसान झाले. 2019 आणि 2021 चा महापूर सर्वात मोठा महापूर होता. त्यामुळे पूरग्रस्त नागरिकांचे पुनर्वसन करणे आवश्यक आहें. अशी नागरिकांची मागणी आहे.

या मागणीकडे शासनाचे लक्ष वेधण्यासाठी आज आंदोलन झाले. परंतु एकाने पंचगंगा घाटात उडी मारल्याने गोंधळ उडाला. आंदोलनाचे नेतृत्व उत्तम पाटील, बाबासो गोसावी, देवदास लाडगावकर, के.बी. खुटाळे, धनाजी चौगले, अभिजित चौगले यांनी केली.