कोल्हापूर : शारदीय नवरात्रोत्सवाच्या तिसऱ्या दिवशी आज करवीर निवासिनी 'श्री अंबाबाई'ची कौमारी मातृका रूपात सालंकृत पूजा बांधण्यात आली. यंदा उत्सवाच्या चौथ्या दिवशी म्हणजेच उद्या (रविवारी) ललिता पंचमी असून यानिमित्ताने अंबाबाई टेंबलाईच्या भेटीसाठी जाणार असून टेंबलाई टेकडीवर कोहळा फोडण्याचा पारंपरिक विधी होणार आहे. कोरोनाच्या पार्श्वभूमीवर श्रीमंत छत्रपतींच्या उपस्थितीत मोजक्याच लोकांच्या साक्षीने हा सोहळा होणार आहे. तत्पूर्वी अंबाबाई, तुळजाभवानी आणि गुरूमहाराज वाड्यातील पालख्या वाहनातूनच टेंबलाई टेकडीवर येणार आहेत. (kolhapur ambabai worship kaumari matruka)

उत्सवात 'श्री अंबाबाई'च्या सप्तमातृका या संकल्पनेवर पूजा बांधल्या जात आहेत. कौमारी ही देवांचा सेनापती, युध्ददेवता कार्तिकेयाची शक्ती आहे. तिला कुमारी, कार्तिकी किंवा अंबिका म्हणूनही ओळखले जाते. ती मोरावर स्वार असून तिच्या हातात भाला, कुऱ्हाड, टाक आणि धनुष्य असल्याची माहिती श्रीपूजक मयुर मुनीश्वर, सोहम मुनीश्वर आणि सुकृत मुनीश्वर यांनी दिली.